प्रकोपको नियन्त्रणसम्बन्धी तालिम

धुलिखेल÷काठमाडौँ विश्वविद्यालय सिभिल एन्ड जियोमेटिक्स इन्जिनियरिङ विभाग र युनेस्को — आईएचई वाटर एजुकेसन इन्स्टिच्युट निदरल्यान्डको संयुक्त आयोजनामा भएको ‘सहरी क्षेत्रमा बाढी–प्रकोपको नियन्त्रण ः भविष्यका आन्तरिक र बाह्य चुनौतीहरू’ विषयक दक्षिण एसियाली क्षेत्रीय पुनर्ताजगी तालिमको बुधबार समापन कार्यक्रम सम्पन्न भएको छ ।
उक्त पुनर्ताजगी तालिम गत १५ गते प्रारम्भ भएको थियो । तालिममा २० जना विद्यार्थी तथा १० जना दक्षिण एसियाली क्षेत्रका विशेषज्ञहरू सम्मिलित थिए । समापन कार्यक्रममा प्रमुख अतिथिका रूपबाट सहरी विकास मन्त्रालयका सचिव किशोर थापाले सहरको विकास र दीर्घकालीन सुरक्षाका लागि यस्ता कार्यक्रमहरूको महत्व हुने कुरामा जोड दिँदै यस्ता कार्यक्रमबाट सिकेको ज्ञान व्यवहारमा प्रयोग गर्न सके सुनामी जस्ता प्रकोपहरूबाट हरेक सहरी क्षेत्रलाई जोगाउन सकिने कुरा बताउनुभएको थियो ।
स्कुल अफ इन्जिनियरिङका डिन डा. भोला थापा, केन्द्रीय आयोजक समिति युनेस्को — आईएचईका अध्यक्ष डा. असेला पाथिराना र स्थानीय आयोजक समिति सिभिल एन्ड जियोमटिक्स इन्जिनियरिङका अध्यक्ष डा. रमेशकुमार मास्केले कार्यक्रमका बारेमा जानकारी दिनुभएको सो समारोहको सभापतित्व रजिस्ट्रार डा. भद्रमान तुलाधरले गर्नुभएको थियो ।