विपन्न महिलालाई बाख्रा वितरण

खुशियाली महिला समुह मिल्चे ७ ले एक कार्यक्रमका बीच आर्थिक विपन्न महिलाहरुलाई बाख्रा वितरण गरेको छ ।
जिल्ला विकास समिति काभ्रेका कार्यक्रम अधिकृत विदुर गौतमको प्रमुख आतिथ्यतामा बाख्रा वितरण गरिएको थियो । कार्यक्रममा नेपाली कांग्रेस काभ्रे क्षेत्र नं. २ का सभापति रमेशप्रसाद हुमागाईं, संगठन शाखा प्रमुख प्रकाश थापा, संस्थाका सचिव पुतलीमाया दर्लामी, नेपाली कांग्रेस गाउँ इकाइ सभापति ओमबहादुर घ्यावा, सरस्वती निमाविका प्रअ रत्न घिसिङ लगायतले महिलाहरुको सिप विकास र क्षमता विकासको सम्बन्धमा धारणा राखेका थिए ।
तिनदिने बाख्रापालन तालिम पश्चात तिनवटा समुहमा बाख्रा वितरण गरिएको थियो भने तिनवटा समुहका पदाधिकारीलाई महिला अधिकार सम्बन्धी तालिम दिइएको थियो । महिला अधिकार सम्बन्धमा लैङ्गिक विभेद सम्बन्धमा कार्यक्रम अधिकृत गौतम महिला हिंसा र महिला अधिकार सम्बन्धमा अधिवक्ता रमेशप्रसाद हुमागाईं, महिला नेतृत्व विकास सम्बन्धमा प्रकाश थापा, बाख्रापालन सम्बन्धमा विष्णु थापा, रत्न घिसिङ लगायतले प्रशिक्षण दिएका थिए भने संस्थाकी अध्यक्ष चरिमाया तामाङको अध्यक्षतामा कार्यक्रम सम्पन्न भएको थियो ।