राणाकालीन विद्यालयमा जिशिअ

दाप्चा÷भवन अभावमा पाटीमा बसेर पढ्न बाध्य काभ्रेको दाप्चा स्थित दाप्चा माध्यमिक विद्यालयमा जिल्ला शिक्षा अधिकारी दिनानाथ गौतम पुगेका छन् ।
विभिन्न सञ्चार माध्ययममा यसको दुराअवश्था बारे समाचार प्रशारण र प्रकाशन भएपछि जिशिअ गौतम त्यहाँ पुगेका हुन् । वि सं १९८६ मा स्थापना भएको जिल्लाकै पुरानो विद्यालयका विद्यार्थीहरु भवन अभावमा पाटीमा पढ्न बाध्य छन् । विद्यालयका प्रधानाध्यापक दिनेशप्रसाद अधिकारी, विद्यालय व्यवस्थापन समितिका सदस्य, अविभावक, शिक्षक स्टाफहरुले विद्यालयको अवश्था बारे जिशिअलाई जानकारी गराएका थिए । विद्यालयका प्रधानाध्पक अधिकारीले २००७ सालभन्दा अघिको विद्यालय भएपनि सरकारी नीति अनुरुप सरकारी सुविधा पाउन नसकेको गुनासो गरेका थिए ।
सरकारले ००७ साल भन्दा अघिका विद्यालयको लागि १९ लाख सहयोग गर्ने गरेको छ । सम्पुर्ण प्रकृया र कागजात पेश गरेपनि विद्यालयले सो रकम प्राप्त गर्न सकेको छैन । प्रअ अधिकारीले १ वटा कोठा बारेर पढाउनुपर्ने लगायतका विद्यालयका बाध्यता जिशिअ लाई अवगत गराएका थिए । कक्षाकोठाको पनि अभाव छ, भवन अपुरो छ, पहिला पनि सहयोग पाउन सकिएन, तपाईको कार्यकालमा सहयोग गरिदिनुपर्यो । उनले भने ।
निरिक्षण पछि जिशिअ गौतमले यसअघि विद्यालयले सहयोग प्राप्त गर्न नसके पनि आफ्नो कार्यकालमा प्राथमिकतामा राखेर सहयोग गर्ने प्रतिवद्धता व्यक्त गरे । सात साल भन्दा अघिका विद्यालयलाई सहयोग गर्ने सरकारी नीति नै छ, मैले सकेको सहयोग गर्छु ।
आफ्नो कार्यकालमा सहयोग गर्न कुनै कसुर बाँकी नराख्ने प्रतिवद्धता पनि उनले व्यक्त गरे । विद्यालयको कक्षा ४ का २२ जना विद्यार्थीहरु अहिले स्थानीय विन्धवासिनी मन्दिरको पाटीमा बसेर पढ्छन् । भवन अभावकै कारण पं्रावि तहका सबै कक्षालाई बाडेर पढाइएको छ । बाल कक्षा र १ लाई बारेर बनाएको १ वटा कक्षा २ र ३ लाई एउटा र ४ र ५ लाई अर्को गरी बनाईएको साँघुरो कक्षामा बसेर यतिखेर विद्यार्थीहरु पढन् बाध्य छन् ।
१९८६ सालमा भाषा पाठशालाको रुपमा सञ्चालनमा आएको विद्यालय जिल्लाकै पुरानो विद्यालय हो । ८३ बर्ष पछि बल्ल विद्यालयले पहिलो पटक यसैबर्ष एसएलसी परिक्षामा सहभागी समेत भएको थियो । हाल विद्यालयमा ३ सय ६७ विद्यार्थीहरु अध्ययनरत्त छन् ।
गाविसकै एकमात्र माध्यमिक विद्यालयमा विद्यार्थीको चाप पनि बढी छ । डराउनेपोखरी गाउँ विकास समितिले बार्षिक डेढ लाख जति रकम छुट्याउने त गरेको छ तर मावि दरवन्दी नभएको विद्यालयमा श्रोतमा शिक्षक राख्नुपर्ने बाध्यताका कारण उक्त पैसा पनि शिक्षक तलवमा नै खर्च हुन्छ । माध्यमिक दरवन्दी नभएकै कारण ४ जना माध्यमिक शिक्षकको लागि बार्षिक ५ लाख जति रकम तलवमा खर्च हुन्छ । न्यून पारिश्रमिकमा पढाउन शिक्षकहरु बाध्य छन् ।