कफिको व्यवसायिकीकरणमा लाग

काभ्रेपलाञ्चोक जिल्ला कृषिको क्षेत्रमा अग्रणी जिल्ला हो । दुध तथा तरकारी उत्पादनको हिसावले पनि काभ्रे अग्रणी जिल्ला मानिन्छ । यहाँको वातावरण, हावापानी, माटो कृषिको लागि अनुकुल छ । राजधानीसँग नजिकैको जिल्ला भएको कारणले पनि यहाँ बजारको समस्या छैनन् । डाँडापारी क्षेत्रका केही गाविस बाहेक अन्य गाविसमा यातायात तथा ढुवानीको समस्या छैनन् । उत्पादित सामाग्री सजिलै बजारमा पुग्ने गरेको छ ।
पछिल्लो समय जिल्लामा कफिको व्यवसायिक खेती हुने गरेको छ । जिल्लाको महादेवस्थान, चण्डेनीमण्डन, जैशिथोक, पाँचखाल, ज्याम्दी, अनेकोट, च्याम्राङ्गवेशी लगायत २ दर्जन भन्दा वढि गाविसका  करिव ४ हजार कृषकहरु अहिले प्रत्यक्ष रुपमा कफिखेती तिर लागेका छन् ।
काभ्रेमा बार्षिक ४४ टन कफि उत्पादन हुँदै आएको छ । १ सय ५० हेक्टर क्षेत्रफलमा कफि खेती गर्ने गरिएको छ । एकपटक रोपेपछि पटक–पटक रोपिरहनु नपर्ने, नियमित सिंचाई र मलको आवश्यकता नपर्ने आदि कारणले गर्दा कफि खेती गर्न सजिलो छ । नगदेबाली कफि अहिले जिल्लाका सुख्खा डाँडाहरुमा लटरम्म फलेका छन्  । वर्षमा २ पटक आम्दानी लिन सकिने कफि खेती गरिएको जग्गामा घुसुवा बालीका रुपमा अदुवा, हलेदो , तथा अन्य तरकारीहरु पनि रोप्न सकिन्छ । जसले गर्दा एउटै जग्गाबाट दोहोरो आम्दानी लिन सकिन्छ ।
जिल्लामा उत्पादित कफि जिल्लाका अतिरिक्त राजधानी लगायत देशका विभिन्न शहरहरुका साथै विदेश समेत निर्यात हुने गरेको छ । किसानहरुले उत्पादित कफि मात्र नभएर यसका विरुवाहरु पनि तयार गरेर बेच्ने गरेका छन् ।
कफि खेतीको थप व्यवसायिकीकरण गर्न आवश्यक छ । जिल्लामा कफि खेती हुन सक्ने भुभागमा माटो परिक्षण गरी यसको खेती बढाउनुपर्छ । थप विरुवा लगाउन कृषकहरुलाई अनुदानको व्यवस्था गर्नुपर्छ । जिल्ला कृषि विकास कार्यलय लगायत सरोकारवाला निकाय यसको विस्तारमा राख्नुपर्छ । किसानहरुले उचित मुल्य पाउने वातावरण तयार गर्नुपर्छ । अनि मात्रै जिल्लामा कफि खेतीको थप व्यवसायीकरण गर्न सकिन्छ ।