१ हजार १ सय ३५ दीक्षित

काठमाण्डौँ विश्वविद्यालयको अठारौँ दिक्षान्त समारोहमा स्कुल अफ साइन्स, स्कुल अफ इन्जिनियरिङ, स्कुल अफ आर्ट्स, स्कुल अफ म्यानेजमेन्ट र स्कुल अफ एजुकेसनअन्तर्गतका स्नातक, स्नातकोत्तर र विद्यावारिधि तहका १ हजार १ सय ३५ जना विद्यार्थी दीक्षित भएका छन् । दीक्षित हुनेमा ४ सय ८५ महिला र ६ सय ५० पुरुष छन् । चौरान्नव्वे विदेशी विद्यार्थी पनि समारोहमा दीक्षित भए । समारोहमा चान्सलर स्वर्णपदक स्नातकोत्तर तहमा सबैभन्दा बढी ३.९३ सीजीपीए प्राप्त गर्ने एमएडका मविन्द्र रेग्मीलाई, भाइसचान्सलर स्वर्णपदक स्नातक तहमा सबैभन्दा बढी ३.९८ सीजीपीए प्राप्त गर्ने बायोटेक्नोलोजीका सिल्भा श्रेष्ठ र मेकानिकल इन्जिनियरिङका सौगात तिमिल्सिनालाई, जुद्धबहादुर श्रेष्ठ स्वर्णपदक एमबीए तहमा सबैभन्दा बढी ३.८८ सीजीपीए प्राप्त गर्ने ईशा धौभडेललाई र रणबहादुर शाह स्वर्णपदक एमबीए तहका सर्वोत्कृष्ट विद्यार्थी रविकान्त अग्रवाल (सीजीपीए ३.७३) लाई प्रदान गरियो ।
स्कुल अफ मेडिकल साइन्सेजअन्तर्गतका स्नातकोत्तर तहका १ सय ४२ विद्यार्थीहरू पनि सोही समारोहमा दीक्षित भएका थिए ।
समारोहमा प्रमुख अतिथिका रूपमा नेपाल राष्ट्र वैँकका प्रथम गर्भनर हिमालयशमशेर जबराले दीक्षान्त भाषण गरेका थिए । उनले राजनैतिक अस्थिरता र अस्थिर नीतिको कारण पुँजी पलायन भैरहेको बताए । उनले मजदुर हड्तालको कारण देशमा उद्योग व्यवसाय फस्टाउन नसकेको तर्क गरे । उनले सबै क्षेत्रमा राजनैतिक हस्तक्षेप भएकाले देशले प्रगति गर्न नसकेको तर्क गरे ।
पुर्व उपकुलपति डा. शुरेसराज शर्माले सूचना–प्रविधि, जलस्रोत र अन्य ऊर्जा उत्पादन प्रविधि, कृषि–प्रविधि एवम् स्वाथ्यशिक्षातिर केयुका दीक्षितहरु लाग्ने विश्वास व्यक्त गरे ।