असहाय बाल बालिकासँग पल्टन इटहरीमा

अपाङ्ग तथा असहाय बालबालिकाको सहयोगार्थ चलचित्र पल्टनको च्यारिटी सो गरिएको छ ।

काभ्रेली कलाकार तथा निर्मार्ता बिक्रम शाहको प्रस्तुती श्रेया इन्टरटेन्मेन्टको ब्यानरमा निर्माण भएको चलचित्रको पौष २१ गते इटहरीमा च्यारिटी सो गरिएको हो ।
१४ गते नै च्यारिटी सो गर्ने कार्यक्रम रहेपनि मौसमको खरावीको कारण सो हुन सकेको थिएन । समाजलाई स्वच्छ बनाउन नागरिकको उल्लेख्य भुमिका रहने भएकोले समाजमा रहेका खराब तत्वलाई नास गरी समाजको बिकास गर्दै लानु प्रत्येक नागरिकको कर्तव्य हो । नागरिक पल्टनका यस्तैै बिषयवस्तुलाई समेटेर निर्माण गरिएको चलचित्र हो पल्टन ।
आफ्नो पहिलो एल्बमको “ भकुण्डेमा एउटा स्कूल छ………” बोलको लोक दोहोरी गीतबाट नै चर्चामा आएका र बैनीले गाँसेको फुलमाला, आउ नेपाल फर्केर, ब्युटीपार्लर गइछिन, दोधार, रेलमा रुँदै गईँ लगायत करिब दर्जन भन्दा बढी एल्बम मार्फत आफुलाई लोक दोहोरी गायकको रुपमा समेत चिनाउन सफल बिक्रम शाहले चलचित्र “पल्टन” निर्माण गरेका हुन् ।
चलचित्रमा काभ्रेली प्रतिभाहरुको प्रस्तुती देख्न पाइनेछ । लामो समयदेखि नाटक क्षेत्र, दोहोरी गायन एवं अभिनयमा तथा चलचित्रहरुमा सहायक निर्देशक, दर्जनौ म्युजिक भिडियो तथा करिब आधा दर्जन जति टेलिश्रृङ्खलाहरुमा निर्देशन गरिसकेका प्रतिभा कमल दाहालको पटकथा संवाद तथा लामो समयदेखि कलाकारिता क्षेत्रमा लागि लोक तथा आधुनिक नृत्यको क्षेत्रमा आफ्नो छुट्टै अस्तित्व निर्माण गरिसकेका, थुप्रै म्युजिक भिडियो तथा रंगमञ्चमा निर्देशन गरी आफूलाई कलाकारितामा होम्दै आएका अमरकृष्ण चन्दले सहायक निर्देशकको रुपमा काम गरेका छन् ।
नयाँ पुस्ता र पुराना पुस्ताका कलाकारहरुको संगम रहेको उक्त मल्टिस्टारले भरिएको चलचित्रमा पुरानो सम्झना, लाहुरे, कुसुमे माल जस्ता सफल चलचित्रकी नायिका तृप्ती नाडकर प्रमुख भूमिकामा रहेकी छिन् भने कलिउडका महानायक राजेश हमालको समेत मुख्य भूमिका छ । त्यस्तै नायकहरु अमृत लामा, पुष्कर रेग्मी, दिनेश थापा, करण क्रेजी, कुशल थापा, दिपेन्द्र श्रेष्ठ रहेका छन् ।
प्रतिष्ठा प्रसाई, संजिता गुरुङ्ग, विजय देउजा, शंखरत्न महर्जन, कमल भण्डारी, मणिरत्न पौडेल, राजु अधिकारी, पोखराकी पूर्व मिस मंगोल भुमा थापा मगर तथा चलचित्रका प्रस्तुतकर्ता बिक्रम शाह एवं अमरकृष्ण चन्द आदिको अभिनय रहेको छ ।
विक्रम शाहको प्रस्तुती, पोखरेली निर्देशक बासुदेव पोखरेलको कथा÷निर्देशनमा निर्माण भइरहेको चलचित्र पल्टनमा निर्माता मणिरत्न पौडेल, हरिचन्द्र रावल रहेका छन् । त्यस्तै पटकथा संवाद कमल दाहाल, संगीत अशोक राई, द्वन्द रोशन श्रेष्ठ, नृत्य बब्बु थापा, छायाँकन सुमन तण्डुकारको रहेको छ भने निर्माण नियन्त्रकमा बुद्धिलाल मगर रहेका छन् ।
चलचित्रका अधिकांश छायाँकन पर्यटकीय नगरी पोखराका सुन्दर प्राकृतिक सौन्दर्यलाई कैद गरिएको छ । आगामी माघमा चलचित्र प्रदर्शनमा ल्याउने लक्ष्य रहेको चलचित्रका निर्माता विक्रम शाहले बताए । चलचित्रको प्रदर्शन बाट उठेको रकम मध्ये खर्च कटाएर बालबालिकाको क्षेत्रमा सहयोग गर्ने समेत शाहले बताए ।