दोलालघाट क्षेत्रको विकासमा लाग

दोलालघाट पर्यटकहरुको प्रमुख गन्तव्य हो । सुनकोशीको किनार, यहाँको माछा र डुङगा यहाँका आकर्षण हुन् । राजधानीबाट नजिक रहेकाले पनि धेरैको रोजाइमा यो स्थान पर्छ । पक्की सडक, अरनिको राजमार्ग जोडिएकोले सहज यायायातको व्यवस्थाका कारण यो क्षेत्र सहज पनि छ पर्यटकको लागि । त्यसैले त यहाँ यहाँ पिकनिक मनाउन र घुम्न आउनेको भिड नै लाग्छ । काभ्रे र सिन्धुपाल्चोकको सिमानामा रहेको दोलालघाटमा व्यापारिक चहलपहल पनि उत्तिकै छ  ।
चर्चाकै भरमा चलेको दोलालघाटको पर्यटन खासै व्यवस्थित हुन सकेको छैन, नत यो क्षेत्रको प्रर्वद्धनको लागि कुनै प्रयास नै भएको छ । अघिल्लो बर्ष दोलालघाट महोत्सव आयोजना गरिएको भएपनि त्यसले खासै अर्थ समेत राख्न सकेन । अर्को तितो यथार्थ पनि के हो भने यसले निरन्तरता पनि पाएन । स्थानीयको कम चासो, सरकारी निकायको बेवास्थाका कारण देशकै प्रमुख पर्यटकीय गन्तव्य वन्न सक्ने दोलालघाटले आफ्नो क्षमता अनुसारको पर्यटकलाई स्वागत गर्न पाइरहेकोे छैन । माछा मार्नको लागि करेन्टको प्रयोग गर्ने प्रचलन बढेसँगै सुनकोशी नदीमा माछा समेत कम पाइन थालेको  छ । पहिला पहिला माझीहरुले डुङगामार्फ नै राम्रो आम्दानी गर्थे भने अहिले त्यो अवश्था पनि छैन । केहीले मनोरञ्जनको लागि मात्रै डङगा चढ्ने गरेका छन् । यहाँको व्यापार पनि क्षमता अनुसार फस्टाउन सकेको छैन । यहाँ आउने पर्यटकको लागि व्यवस्थित वसोवासको लागि समेत दोलालघाटले व्यवस्था गर्न सकेको छैन ।
यहाँको पर्यटकीय सम्भावनाहरुलाई उजागर गरेर यहाँ आउने पर्यटकलाई प्याकेज दिनु आवश्यक छ । यहाँ ¥याफ्टिङ, बोटिङ लगायतका सम्भावना पनि छन् । नजिकै रहेका अन्य पर्यटकीय क्षेत्रहरुलाई पनि समेटेर यो क्षेत्रको पर्यटकीय गुरु योजना बनाउन पनि जरुरी भएको छ । चर्चाकै भरमा चलेको दोलालघाटलाई व्यवस्थित बनएर लैजान सके यो देशकै एक प्रमुख गन्तव्य वन्न सक्छ । यसका लागि स्थानीयको पहल र  सरोकारवालाहरुको चासो आवश्यक छ । दोलालघाटलाई एउटा व्यवस्थित पर्यटकीय स्थल बनाउन अब ढिला भइसकेको छ । काभ्रेको गौरवको रुपमा रहेको दोलालघाटलाई प्रमुख पर्यटकीय स्थल बनाउने अभियानमा हामी सबै लागौँ ।