“चर्पी नहुनेलाई खानेपानी सुविधा छैन”

धुलिखेल÷ “चर्पी नहुनेलाई  खानेपानी सुविधा छैन” सुन्दै अचम्म लाग्ने यो नियम धुलिखेलको वास्तविकता हो । धुलिखेल नगर क्षेत्रमा शौचालय नभएका घरहरुले खानेपानी सुविधा नपाउने भएका छन् ।
धुलिखेल खानेपानी उपभोक्ता समितिले चर्पी नहुने नगरभित्रका घरधुरीलाई धारा वितरणमा रोक लगाउने भएको छ ।
सन् २०१३ भित्र खुल्ला धुलिखेल नगर बनाउने कार्यनीति अन्तर्गत चर्पी बनाउन अटेर गर्ने घरधुरीहरुका लागि नयाँ धारा वितरणमा रोक लगाइएको खानेपानी उपभोक्ता समितिका अध्यक्ष राजकुमार तखाछे श्रेष्ठले जानकारी दिए ,
उनका अनुसार, चर्पी नबनाउने झण्डै आधा दर्जन घरहरुमा धारा वितरण गरिएको छैन । खानेपानी वितरण गरे बापत बार्षिक करिब एक करोड १० लाख रकम संङ्कलन गर्ने समितिले करिब एक हजार ९ सय वटा धारा वितरण गरेको छ ।
नगरभित्र एक सय भन्दा बढी घरधुरीमा अझै चर्पी बन्न बाँकी रहेको धुलिखेल नगरपालिकाका कार्यकारी अधिकृत गणेश नेपालीले जानकारी दिए । १६ हजार जनसङ्ख्या रहेको धुलिखेल नगरपालिकालाई नगरस्तरीय खानेपानी तथा सरसफाइ स्वच्छता समन्वय समितिले सन् २०१३ भित्र खुल्ला दिसामुक्त नगर बनाउने लक्ष्य राखेर काम अगाडी बढाएको छ ।