स्वास्थसेवा पाउँदा खुशी भए रविओपीवासी,,,,, सेल लुव्रिकेन्ट विक्रेताको भेला

रविओपी ÷ रविओपी ४ की  ७६ बर्षिय चित्रकुमारी कोइराला १ घण्टा पैदल हिँडेर गंगादेवी माध्यमिक विद्यालयमा आइन् । उनी प्रारम्भ नामक गैरसरकारी संस्था र शुभारम्भ कृषि फार्मको सहयोगमा विद्यालयले आयोजना गरेको स्वास्थ्य शिविरमा परिक्षण गर्न आएकी हुन् । उलने आँखा, पेट लगायत सामान्य स्वास्थ्य परिक्षण गरिन् र निशुल्क औषधी समेत पाइन् । “गाउँमा नै सेवा पाउँदा साह्रै खुशी लाग्यो ” उनले भनिन् ।
शिक्षा, स्वास्थ्य, मानववेचविखन नियन्त्रण लगायतको क्षेत्रमा काम गर्न खुलेको संस्थाले गाउँमा नै विशेषज्ञ ल्याएर स्वास्थ्य सेवा दिएको थियो । स्त्रीरोग विशेषज्ञ डा. रोजी वैद्य मल्ल, नाक, कान, घाँटी रोग विशेषज्ञ डा. प्रविणा रायमाझी सहित १२ जना को मेडिकल टिमले सेवा प्रदान गरेका थिए । विभिन्न क्षेत्रमा मानिसहरुले सामान्य स्वास्थ्य सेवा समेत नपाएको पाएकाले शिविर आयोजना गरिएको प्रारम्भकी अध्यक्ष अनिता क्षेत्रीले जानकारी दिइन् । शिविरमा   जनाले स्वास्थ्य सेवा लिएका थिए ।

सेल लुव्रिकेन्ट विक्रेताको भेला
बनेपा ÷ नेदरल्याण्डको रोयल डच सेल कम्पनीको उत्पादन सेल लुव्रिकेन्टस् (मोविल) को जिल्ला स्थित विक्रेताहरुको भेला गरिएको छ । बनेपास्थित आधिकारीक विक्रेता चैत्य लक्ष्मी इन्टरनेशनलले पनौती, तामाघाट, बनेपाका गाडी तथा मोटरसाइकलका पार्टस् विक्रेता र यातायात व्यवसायीहरुलाई उत्पादन बारे जानकारी गराइएको हो ।
एपिआई विजनेश प्रालिका सगुनविर कंसाकार र कविर श्रेष्ठले उनीहरुलाई उत्पादनबारे जानकारी गराएका थिए । डच सेल कम्पनी आम्दानीको हिसावले विश्वकै ठूलो कम्पनी हो । सेल लुव्रिकेन्ट विगत ५ बर्षदेखि विश्वभरी नै उत्कृष्ट उत्पादन रहँदै आएको छ । ठूला कार कम्पनी हुन्डाई, मारुती, सुजुकी, टाटा, किया, फोर्ड, स्कोडा, महिन्द्रा लगायतका कम्पनीले पनि यही लुव्रिकेन्ट प्रयोग गर्न सिफारिस गर्ने गरेका छन् । कार्यक्रममा काभ्रे उद्योग वाणिज्य संघका महासचिव एवं काभ्रे मिनिवस सेवा समितिका अध्यक्ष सुरकृष्ण वैद्य, चैत्य लक्ष्मी इन्टरनेशनलका सञ्चालक शान्तीरत्न शाक्य लगायतले यातायात क्षेत्रबारे चर्चा गरेका थिए ।