वहुप्रतिभाका धनी थिए रविन्द्र

प्रदीप के.सी.
आफ्नो अध्ययनको कक्षा तीनदेखि एस.एल.सी. र पाइलट तालिममा समेत प्रथम हुने रविन्द्र बञ्जारा, वहुमुखी प्रतिभाका धनी थिए ।
नेपाल वायुसेवा निगमको ९ एन.एबीबी ट्विन्टर विमान अर्घाखाँची जिल्लाको खाँचिकोट मसिनेलेकमा यहि फाल्गुण ४ गते दूर्घटना भई चालक दलका तीनजना सहित १८ जनाको दुःखद् निधन भएको थियो । उक्त विमानमा जुनियर क्याप्टेन (कोपाइलट) रविन्द्र बञ्जाराको दुःखद् निधन भएका थियो ।
२०४२ साल माघ २ गते पनौती–३, बञ्जारागाउँमा पिता दुर्गाप्रसाद बञ्जारा र माता अम्बिका बञ्जाराको कोखबाट जन्मिएका रविन्द्र सरस्वती कुञ्ज बोर्डिङ्ग स्कूलका पहिलो एस.एल.सी. ब्याचका सर्वाेत्कृष्ट भएको उनी अध्ययनकै क्रममा राष्ट्रव्यापी एलजी हाजिरीजवाफ प्रतियोगितामा प्रथम भएपछि पाकिस्तानमा आयोजित सार्कस्तरीय हाजिरीजवाफमा नेपालको प्रतिनीधित्व गरी चौथा भएका थिए ।
मेधावी विद्यार्थी रविन्द्रले सार्क मै स्कूलको नाम राखेपछि पाइलट बनी उत्कृष्टता देखाए । हुने कुरा दैवले टार्न नसक्ने सावित गराई उनले छोडेर गए, सरस्वती कुञ्ज बोर्डिङ स्कूलका संचालक सुरेश सैंजूले बताए ।
सेन्टजेभियर्स कलेजबाट आईएस्सीमा उच्च अंक ल्याएका रविन्द्रले काठमाडौं विश्वविदालयबाट बिएस्सी गर्दा गर्र्दै छाडेर नेपाल वायु सेवा निगमको पाइलट तालिम लिने अवसर पाएका थिए ।
निगमको पाइलट बन्न ३० लाख रुपियाँ बराबरको धितो, १० वर्षसम्म सेवा गर्नुपर्ने र तालिमको रकम तलबबाट कट्टा हुँदै जाने निगमको शर्त पालना गरेर मलेशियाको एशिया फ्लाइट ट्रेनिङबाट १६ महिने तालिम सकेर पहिलो भएका थिए ।
उनी निगममा काम गर्न थालेका छ वर्षमात्र भएको थियो । पनौतीबाट ड्यिुटी नभ्याइने भएकाले काठमाडौंमै कोठा लिई बसेका थिए र उनी माघ २५ गते पनौती घर आएका थिए भने घर परिवारका सदस्यसँग त्यही दिन उनको अन्तिम भेट हुन पुग्यो ।
सँधै व्यस्त रहने छोरासँग मेरो बिहिबार फोनमा कुरा भएको थयिो आइतबार साथीकोमा भोज खाएर नेपाल टेलिकम बनेपाको अफिस पुगेका पिता दुर्गाप्रसाद बञ्जाराले छोरो उठानमा रहेको जहाज बेपत्ता भएको खबर पाएका थिए ।
रविन्द्रको परिवारमा पिता नेपाल टेलिकम बनेपा शाखामा अधिकृत, भाई रोशन शीर मेमोरियल अस्पताल बनेपामा डाक्टर छन् भने बहिनी रञ्जना काठमाडौं विश्वविद्यालयबाट भर्खरै इन्जिनियरिङ्ग गरेकी थिइन् ।
पछिल्लो समयमा अर्थशास्त्रमा स्नाकोत्तर गर्दै थिए भने दुई वर्ष अघि मात्र रविन्द्रले एलिनासँग प्रेम विवाह गरेका थिए । श्रीमती एलिना इन्जिनियरिङ्ग अध्ययनको लागि अमेरिका पुगेकी थिइन्  खेलकुदमा समेत चाख राख्ने रविन्द्र फुटबलमा जहिलेपनि वेस्ट प्लेयरको उपाधि पाउने गर्थे ।