‘स्कुल छाडेर ३–४ पटक सुटिङ हेर्न गइयो ।’

अर्जुन घिमिरे (पा“डे), हा“स्यकलाकार

० छोटो समयमै भद्रगोल टेलिश्रृंखला धेरै लोकप्रिय भयो यसको कारण ?
भद्रगोल टेलिश्रृंखला अहिले निर्माण भइरहेका अरु हाँस्य टेलिश्रृंखला भन्दा केही फरक छ । हामीले बिशुद्ध सामाजिक कथावस्तुलाई रोचक ढंगले प्रस्तुत गरेका छौं । दर्शकहरुको चाहना अनुसार निर्माण भएकोले पनि यो टेलिश्रृंखला लोकप्रिय भएको हो ।
० भद्रगोलका कलाकाहरहरु प्राय सबै लोकप्रिय छन्, किन ?
भद्रगोलका कलाकारहरु सबैजनाको आफ्नो छुट्टै विशेषता र पहिचान छ । भद्रगोलका कलाकारहरुलाई चिनाउन अरु कसैको सहायताको जरुरी छैन । आफ्नो छुट्टै गेटअप र बोल्ने शैली भद्रगोलका कलाकारहरुको विशेषता हो ।
० जसरी मेरी बास्सैमा सिताराम कट्टेल र केदार घिमिरेको जोडी चर्चित छ, त्यसैगरी भद्रगोलमा कुमार कट्टेल र अर्जुन घिमिरेको जोडी चर्चित छ । के तपाइहरुको जोडी लामो समय टिक्ला त ?
सिताराम कट्टेल (धुर्मुस) र केदार घिमिरे (माग्नेबुढा) लामो समय देखि हाँस्य टेलिश्रृंखला मेरी बास्सैमा निर्देशन तथा अभिनय गर्दै आइरहनु भएको छ । दुर्भाग्य वस् उहाँहरुको जोडीको बीचमा ब्रेकअप हुनपुग्यो तर अहिले उहाँहरुको जोडीको मित्रतामा सुधार आइसकेको छ । मेरो जोडी कुमार कट्टेल, सिताराम कट्टेलको आफ्नै भाइ हुनुहुन्छ । हामीले धेरै कुराहरु बुझेका छौं । हाम्रो लक्ष्य, सपना एउटै छ हामीले धेरै काम गर्नुछ र हामीले सानोतीनो कुरामा अल्झिनु हुँदैन ।
० कुमार कट्टेल, सिताराम कट्टेलको आफ्नै भाई हुन् । पत्रपत्रिकामा तपाइ पनि केदार घिमिरेको भाइ भनेर छापिएको पाइयो । तपाइहरु बीचको सम्बन्ध के हो ?
केदार घिमिरे मेरो आदरणिय दाई हुनुहुन्छ, तर तपाइले भनेझैं एउटै कोखको दाई होइन । उहाँको जन्मस्थल मकवानपुर हो भने मेरो जन्मस्थल नुवाकोट हो ।
० कलाकारिता प्रति रुचि सानैदेखि थियो कि पछि भएको हो ?
म सानैदेखि कमेडि पाराको थिएँ । ३–४ कक्षा पढ्दा देखि नै म स्कुलमा हुने साँस्कृतिक कार्यक्रमहरुमा भाग लिन्थें । त्यही समयमा गाउँमा मञ्चन भएको कमेडी नाटकमा साहुको भूमिकामा अभिनय गरें, जुन नाटकमा मैले तीनपटक मर्नुपर्ने सिन थियो ।
० पहिलो पटक क्यामेरा फेस कहिले गर्नुभयो ?
कक्षा ९ मा पढ्दा साथीको लहै लहैमा लागेर बसुन्धरामा हिजोआजका कुरा टेलिफिल्मको सुटिङ हेर्न गएको थिएँ । स्कुल छाडेर ३–४ पटक नै सुटिङ हेर्न गइयो । सुटिङ हेर्ने क्रममा कलाकार नितेशराज पन्तले हिजोआजका कुरा टेलिफिल्ममा सानो भूमिकामा अभिनय गर्ने अवसर दिनुभयो । मेरो रोल बिना डाइलगको थियो, तर पनि पहिलो पटक क्यामेरा फेस गर्ने अवसर मलाई हिजोआजका कुरा टेलिफिल्ममा मिल्यो ।
० संघर्षका दिनहरु कस्ता थिए ?
संघर्ष नगरी सफल हुन गाह्रो छ र संघर्ष गर्नु सोचेजस्तो सजिलो हुँदैन । हिजोआजका कुरापछि धेरै टेलिफिल्ममा अभिनय गर्ने अवसर पाएँ । नेपाल १ बाट आउने हाँस्न पाइन्न, कान्तिपुरबाट प्रशारण हुने लगत जुर्ला है, ५२ घुस्सा ५३ ठक्क्र, वाक्क दिक्क तथा सिस्नुपानी टेलिश्रृंखलामा अभिनय गरें ।
० तपाईलाई लाखौं दर्शकहरुमाझ चिनाउने टेलिश्रृंखला त सिस्नुपानी झ्याम्मै हो नि ?
मैले धेरै टेलिफिल्ममा अभिनय गरेपनि सिस्नुपानी झ्याम्मैमा गरेको पाँडेको भूमिकालाई दर्शकहरुले अत्याधिक मन पराइदिनुभयो, जसलाई म भद्रगोल टेलिश्रृंखलामा गर्दै आइरहेको छु । भद्रगोलमा म कलाकार मात्र नभई लेखक तथा मुख्य सहायक निर्देशक पनि हुँ । कुमार कट्टेल र मेरो संयुक्त लेखन तथा मुख्य सहायक निर्देशनमा भद्रगोल टेलिश्रृंखला निर्माण तथा प्रशारण भइरहेको छ ।
० तपाइहरुको जोडी अहिले विभिन्न महोत्सव तथा स्टेज कार्यक्रमहरुमा व्यस्त हुनुहुन्छ, दर्शकहरुबाट कस्तो प्रतिक्रिया पाउनुभयो ?
कुमार र म जोडी भएर धेरै महोत्सव तथा स्टेज कार्यक्रमहरुमा आफ्नो प्रस्तुति देखायौं । हाम्रो प्रस्तुतिलाई दर्शकहरुले अत्यधिक रुपमा मन पराइदिनुभयो । नुवाकोटको महोत्सवमा भद्रगोलका कलाकारहरु आउने थाहा पाएर रसुवा, काठमाडौं तथा धादिङवेंसीदेखिका दर्शकहरु आउनुभएको पाइयो । दर्शकहरुको मायाले गर्दा छोटै समयमा हामीले ६०–७० वटा स्टेज कार्यक्रमहरु गरिसक्यौं ।
० अरु टेलिश्रृंखला लोकप्रिय हुन समय लाग्यो तर भद्रगोलले चाँडै लोकप्रियता पायो किन ?
मेरी बास्सै २२ भागदेखि, तीतो सत्य १८ भागदेखि, जिरेखोर्सानी १३ भागदेखि लोकप्रिय हुँदै गएको हो तर भद्रगोल टेलिश्रृंखला १ भागदेखि लोकप्रिय हुँदै गयो किनकी यसले सिस्नुपानी झ्याम्मैबाट
ै दर्शकहरुमाझ एउटा छुट्टै खालको प्लेटफर्म बनाइसकेको थियो ।
० टेलिफिल्ममा तपाई बुढो मान्छेको भूमिकामा हुनुहुन्छ, तपाईको वास्तविक उमेर कति हो ?
म अहिले २९ वर्षको भएँ ।
० तपाई जुन तरिकाले बोल्नुहुनछ त्यो तरिकाले बोल्दा श्वासप्रश्वासमा केही अप्ठ्यारो महसुस हुँदैन ?
सामानय तवरले बोल्नु क्यारिकेचर गर्नुमा धेरै फरक हुन्छ, हामी कलाकारहरुले आफ्नो भन्दा पनि दर्शकहरुको रुचि र खुशी हेर्नुपर्छ । पाँडेको भूमिकामा बोल्दा केही अप्ठ्यारो महसुस हुन्छ ।
० पाँडेको विशेषता के हो ?
पाँडेको विशेषता अरुको खुशी देख्न नचाहनु हो । अरुले गर्न लागेको काममा अवरोध पु¥याउनु, उल्पट्याङ काम गर्दै हिँड्नु र नेपालको एउटा गरीब परिवारको वस्तुस्थिति देखाउनु पाँडेको विशेषता हो । अरुको काम भाँड्नु पाँडेको काम हो ।
० तपाईको भविष्यको लक्ष्य ?
दर्शकहरुको चाहना अनुसार हाँस्य टेलिश्रृंखला निर्माण गर्नु र विशुद्ध सामाजिक कथावस्तुमा आधारित नेपाली चलचित्रको निर्देशन गर्नु हो ।
० अहिले निर्माण भएका नेपाली चलचित्रहरुले राम्रो व्यापार गर्न सकेको छैन, किन ?
एउटै कथावस्तुमा आधारित फिल्म निर्माण भएकोले गर्दा पनि फिल्मले राम्रो व्यापार गर्न नसकेको हो । यहाँ फरक धारका फिल्म लुट, चपली हाइट, सायद, काली, छ एकान छ, झोला इत्यादिले राम्रै व्यापार गरेका छन् ।
० नेपाली टेलिश्रृंखलाले दर्शकहरुमा कत्तिको चेतना फैलाउन सक्छ ?
हामीले सिधै चेतना दिन मिल्दैन तर हल्का रुपले चेतना फैलाउने काम भद्रगोल टेलिफिल्मले गर्दै आएको छ ।
० तपाई कलाकार नबन्नु भएको भए के गर्दै हुनुहुन्थयो होला ?
म पत्रकार हुन्थें कि !
० अहिलेको समयमा हाँस्य कलाकार भएर जिविका चलाउन सकिन्छ ?
जिविका चलाउन त सकिन्छ तर कुन स्तरको जिविका चलाउने त्यो पहिलो प्रश्न हुनछ । हामी हलिउड, बलिउडका कलाकाहरुको जीवनशैली बिताउन सक्दैनौं । यहाँ लोकप्रिय हुन सजिलो छ तर उच्चस्तरको जिवनशैली बिताउन गाह्रो छ।
० तपाईको कमजोरी ?
अरुलाई छिट्टै विश्वास गर्नु र म छिट्टै रिसाउँछु पनि ।
० तपाईको खुबी ?
म कुनैपनि कुराको छिट्टै निर्णय लिनसक्छु ।
० तपाईलाई मनपर्ने कुराहरु ?
मलाई खेलकुदमा बढी रुचि छ । फुटबल क्रिकेट खेल्न मनपर्छ, फुर्सदमा लेख्न मन पराउँछु, स्विमिङ गर्न र घुम्न मन लाग्छ ।
० तपाईलाई मनपर्ने स्थान ?
सिन्धुपाल्चोक जिल्लाको भोटेचौर ।
० दुःखद् क्षण कुन हो ?
सिस्नुपानी टेलिफिल्म नेपाल टेलिभिजन २ बाट प्रशारण भइरहेको थियो । कुमार र मलाई अकस्मान् टेलिफिल्मबाट निकालियो । हामी धेरै कमजोर भएर काम गरेका रहेछौं, अहिले सम्झँदा धेरै दुःख लागेर आउँछ ।
० अविस्मरणिय क्षण कुन हो ?
नुवाको महोत्सवमा दर्शकहरुले मलाई ‘आज भद्रगोलको हाँस्यकलाकार पाँडे आउने भन्या होइन दाई खोई त देखिएन नि ! भनेर मलाई सोधेको कुरा अविस्मरणिय लागिरहेको छ ।
० राजनीति प्रतिको रुचि ?
राजनीति हामीजस्ता सोझाले गर्ने होइन ।
० विवाह गर्नुभयो ?
मेरो विवाह दुई वर्ष अगाडि भएको हो । अहिले एउटी छोरी छिन् ।
० प्रेम विवाह गर्नुभयो कि मागी ?
कहाँको प्रेम गर्नु मागी गरियो नि !