राहत संकलन तीव्र

धुलिखेल ÷ सिन्धुपाल्चोकको माङ्खा गाविसमा गत शनिबार भएको भीषण पहिरोबाट विस्थापित भएकालाई सहयोग गर्न विभिन्न संघ संस्थाहरुले सहयोग संकलन कार्यलाई तीव्रता दिएका छन् ।
शुक्रबार नेपाल लेखापढि कानून व्यवसायी एशोसियसन काभ्रेले आफ्नो व्यवसायमा आबद्धहरुबाट नगद ५० हजार १ सय ११ रुपियाँ संकलन गरेको नेपाल लेखापढी कानून व्यवसायी काभ्रेका अध्यक्ष हरिबहादुर रानाभाटले बताए ।
शुक्रबार प्रमुख जिल्ला अधिकारी मार्फत हस्तान्तरण गर्ने बताएपनि समय अभावले बुझाउन नसकेको र भोलि सोमबार बुझाउने एशोसियसनका सचिव रोशनकुमार श्रेष्ठले जानकारी दिए ।
त्यस्तै, मंगलबार काभ्रे उद्योग वाणिज्य संघको अगुवाइमा बनेपामा भएको राहत संकलनमा १ लाख १६ हजार उठेको र अझ उठ्ने क्रम जारी रहेको उद्योग वाणिज्य संघ काभ्रेले बताएको छ । काभ्रे उद्योग वाणिज्य संघले भने घटनास्थलमै गएर सहयोग हस्तान्तरण गर्ने जनाएको छ ।

त्यस्तै, लायन्स क्लब इन्टरनेशनले पनि नगद ९० हजार रकम प्रमुख जिल्ला अधिकारीलाई हस्तान्तरण गरेको छ । क्लबका अध्यक्ष हरिप्रसाद मरहठ्ठाले हस्तान्तरण गरेका थिए ।
त्यसैगरि, नेपाल रेडक्रस सोसाइटी काभ्रे शाखाले पनि बाढी प्रभावित १५ सय घरलाई डोरी, पाल र मण्डि वितरण गरेको मन्त्री विश्वनाथ ताम्राकारले जानकारी दिए ।
त्यसैगरी, बनेपाको सिद्धार्थ कलेजले आफ्ना विद्यालय तथा कलेजमा कार्यरत शिक्षक शिक्षिकाको एकदिनको तलबबाट नगद ३१ हजार ५ सय २५ रुपियाँ प्रजिअ केदार न्यौपानेलाई क्याम्पस प्रमुखले हस्तान्तरण गरेका थिए ।
जिल्लामा राहत संकलन अभियानकै रुपमा संचालन भैरहेको छ । त्यसलाई सबैले सहयोग गर्नुपर्ने बताउँदै प्रजिअ न्यौपानेले चाँडै संकलित राहतहरु सम्बन्धित ठाउँमा पु¥याउने बताएका थिए ।