पहिरो पीडितलाई पुनर्वासको व्यवस्था गर

गत साताको पहिरोमा परि सुनकोशी नदीले डुबाएका र मृतकहरुले यथासक्य चाँडो राहत पाउनुपर्छ । राहतको नाममा विभिन्न संघ संस्थाहरुले रकम उठाएपनि पीडित परिवारमा सबै रकम नपुग्ने गुनासो पीडितबाट सुन्नमा आएको छ, तर पहिरो पीडितहरुलाई संघसंस्थाहरुले संकलन गरेको राहत रकममा नभई लत्ताकपडा र खानेकुरामा परिणत गरि सोही स्थानमा गई वितरण गरिएमा अझ राम्रो हुन्छ ।
हालसम्म पहिरोबाट १ सय ५६ जनाको मृत्यु भएकोमा ६० जना शिशु र स्कुले बच्चा परेको जानकारीमा आएको छ भने अरनिको राजमार्ग ४७ किलोमिटर क्षेत्र नाकाबन्दीको रुपमा परेको छ र विद्युत–टेलिफोन पुरै अबरुद्ध, खाद्यान्न र ग्याँसको अभाव भई ३ किलोमिटर भूभाग तालमा परिणत भएको छ ।
सिन्धुपाल्चोकको जुरेमा पहिरो गएको स्थानमा बटुवाहरु बैकल्पिक गोरेटोबाट आवतजावत गरिरहेका छन् । सिन्धुपाल्चोकको प्रमुख बजार बाह्रबिसेका करीब ५८ हजार मानिसलाई पहिरोले प्रभावित पारेको छ ।
पीडितहरुले पेटभरि खान नपाएको, बास बस्न नपाएको, उचित राहत नपाएको, गुनासो सुनिएको छ भने अहिले बाह्रबिसेमा महँगी, कालोबजारी लगायतका व्यथाहरु थपिँदैछन् । यसलाई सरकारले विस्थापितहरुलाई पुनर्वास, उचित राहत दिई व्यवस्थित गराउन जरुरी रहेको छ । धुस्कुनमा केही महिना अघि बनाइएको अस्थायी पुलतर्न समेत पैसा लिने गरिएको पाइयो, पर्यटकहरुसँग समेत दुइहजारसम्म रकम लिएको स्थानीयहरुले बताएका छन् ।
अहिले पहिरो प्रभावित क्षेत्रमा दाल चामलदेखि लिएर मैनबत्तीसम्म लुकाइएको छ । यस्तो हुन नदिन स्थानीय प्रशासनको ध्यान जानु जरुरी छ ।
ताल बढ्दै घर र खेतीयोग्य जमिन डुबाउँदै लगेपछि जंगल, अर्काको घर र कन्टेनर भ्यानमा रात बिताउँदै आएका पहिरो पीडितहरुलाई सरकारले चाँडै पुनर्वासको व्यवस्था गरि ताल बनेको स्थानलाई पर्यटन स्थलमा परिणत गरि वैकल्पिक निकास दिनुपर्ने देखिन्छ ।