कोल्डस्टोरले ८४ लाख क्षतिपूर्ति तिर्ने

पाँचखाल ÷ पाँचखाल कोल्डस्टोरमा एमोनिया ग्याँस चुहिँदा कोल्डस्टोरले ८४ लाख बराबर क्षतिपूर्ति तिर्नुपर्ने भएको छ ।
गत शुक्रबार जिल्ला कृषि विकास कार्यालयका वरिष्ठ कृषि विकास अधिकृत सहदेव प्रसाद हुमागाईं, कोल्डस्टोरका सञ्चालक बद्री तण्डुकार र पीडित किसानहरु बीच भएको छलफलबाट टुसा उम्रिएका आलुलाई प्रति केजी ७ रुपियाँ दरले क्षतिपूर्ति दिने र टुसालाई नष्ट गरेर पुनः नरोप्ने समयसम्म त्यही कोल्डस्टोरमा राख्ने सहमति भएको छ ।
कात्तिक, मंसिरमा रोप्नुपर्ने आलु साउनमा नै कोल्ड स्टोरमा राखेको ठाउँमै टुसा आएपछि किसानहरुले क्षतिपूर्तिको माग सहित जिल्ला प्रशासन कार्यालय, जिल्ला कृषि विकास कार्यालय र कोल्डस्टोरमा क्षतिपूर्ति चाहियो भन्दै आन्दोलन गरेका थिए । पटक पटक वार्ता र छलफल गर्दा पनि सहमति नभएपछि अन्तमा मात्र सहमति भएको थियो ।
किसानले आलु बेचेमा प्रति केजी ५० मा किनिदिने, यदि नबेचिकन लगेमा टुसा उम्रेको आलुलाई प्रति केजी ७ का दरले दिने गरि सहमति भएको पाँचखाल कोल्डस्टोरका सञ्चालक तण्डुकारले जानकारी दिए ।
‘हाम्रो सानो गल्तीले किसानको यत्रो क्षति भयो त्यो बुझेर नै आफ्नो गल्ती स्विकार्दै क्षतिपूर्ति दिन राजी भएको हुँ’ उनले भने ।
४३ हजार बोरा आलु रहेको उक्त कोल्डस्टोरमा २० हजार बोराको मात्र टुसा उम्रिएको तण्डुकारले बताए ।
‘४३ हजारै बोरामा टुसा उम्रिएको छैन तर सबैले यही मौकामा चौका हानौ भनेर आउनु भएको हो, त्यसैले जति बोरामा टुसा उम्रिएको छ, त्यतिलाई क्षतिपूर्ति दिन तयार छौं’ उनले भने ।
उक्त कोल्डस्टोरमा पाँचखाल, बनेपा, साँगा, देउपुर, पनौती, रविओपी, उग्रचण्डी नाला, जनागाल लगायतका ठाउँको आलु राखिएको छ ।