क्लब जन्माउनु ठूलो कुरा होइन, दीर्घकालिन रुपमा टिकाउनु ठूलो कुरा हो : लायन तिमिल्सिना
इच्छाशक्ति भए कुनै पनि कार्य असम्भव हुन्न : लायन हुमागाईं

काठमाडौं । कार्यक्रमका प्रमुख अतिथि डिष्ट्रिक्ट चिफ एडभाइजर लायन सूर्य केसीले सम्बोधन गर्दै क्लबलाई निरन्तरता र दीगोपन कायम राख्नको लागि क्लबका अध्यक्षहरुलाई सक्रिय हुनुपर्ने बताउनुभएको छ । अध्यक्ष सक्रिय नभए क्लब सुस्ताउँछ भन्नुहुँदै क्लबबाट सेवाका कार्य गरिएन भने क्लबमा रहनुको पनि कुनै औचित्य नरहेको समेत बताउनुभएको छ ।

लायन केसीको थप कथन छ– क्लबको कुनै पनि कार्यक्रममा सहभागी हुँदा फर्मल रुपमा उपस्थित हुनुभयो भने नयाँ पुस्ता र समाजमा सकारात्मक प्रभाव जाने बताउनुहुँदै क्लबले सामाजिक कार्य गर्दा क्लबको गरिमा बढाउने कार्य गर्न समेत जोड दिनुभएको छ । साथै एक करोड बराबरको लागतमा तारकेश्वर नगरपालिका वडा नं. १ साङ्लास्थित कम्युनिटी अस्पतालको प्रोजेक्ट पारित भएको समेत कार्यक्रममा खुलासा गर्नुभएको छ ।
लायन्स इन्टरनेशनल डिष्ट्रिक्ट ३२५ आइ अन्तर्गत लायन वर्ष २३–२४ को “इन्स्पायर टु लिड” नारालाई आत्मसाथ गर्दै जोन ३८ ले प्रि–एडभाइजरी कमिटी मिटिङ सम्पन्न गरेको छ । सो कार्यक्रममा जोन चियरपर्सन एमजेएफ लायन प्रल्हाद शर्मा हुमागाईंले सम्बोधनका क्रममा इच्छाशक्ति भए कुनै पनि कार्य सम्पादन गर्न गाह्रो नभएको बताउनुभएको छ । क्लबलाई कसरी दीर्घकालीन र पारदर्शी ढंगले अगाडि बढाउने भन्ने विषयमा आफ्नो धारणा व्यक्त गर्नुभएको छ । त्यसैगरी रिजन मेन्टर लायन संगीता थापा केसी, एडिस्नल कोअर्डिनेटर डिष्ट्रिक्ट बिल्डिङ्ग लायन रामहरी सिलवालले क्लबमा भएको कमी कमजोरीलाई सुधार्दै, समस्याको पहिचान गरी अघि बढ्नुपर्ने बताउनुभएको छ ।

कार्यक्रमको सञ्चालक जोन चियरपर्सन ३८ लायन उद्धव राज तिमिल्सिनाको कथन छ– क्लब जन्माउनु ठुलो कुरा होइन, क्लब दीर्घकालिन रुपमा टिकाउनु ठूलो कुरा हो भन्नुहुँदै आफ्नो क्बल पर्मानेन्ट गर्न सम्पूर्ण क्लबका अध्यक्षहरुलाई आग्रह गर्नुभएको छ । लायन तिमिल्सिनाले आवश्यक परेको खण्डमा जुनसुकै समयमा पनि आफू सेवा सुविधा प्रदान गर्न उपस्थित हुने प्रतिबद्धता समेत व्यक्त गर्नुभएको छ ।

जोन ३८ अन्तर्गत लायन्स क्लब अफ काठमाडौं तारकेश्वर प्लानेट, लायन्स क्लब अफ काठमाडौं तारकेश्वर बालाजु, लायन्स क्लब अफ काठमाडौं लिटिल बुद्ध र लायन्स क्लब अफ काठमाडौं कोअपरटिभका अध्यक्षहरुले आ–आफ्नो क्लबको वार्षिक कार्ययोजना प्रस्तुत गर्नुभएको छ । लायन्स क्लब अफ पूर्वक्षितिज काभ्रेका सचिव लायन बिपशना शाक्य लगायतको उपस्थिति रहेको सो कार्यक्रमको समापन जोन चियरपर्सन लायन उद्धव राज तिमिल्सिनाले गर्नुभएको छ ।