बिपदमा परेकालाई राहत उपलब्ध गराउने रोशी गाउँपालिकाको निर्णय

काभ्रे । काभ्रे जिल्लाको रोशी गाउँपालिकामा स्थानीय विपद व्यवस्थापन समितिको बैठक सम्पन्न भएको छ ।

गाउँपालिका अध्यक्ष दिनेश लामाको अध्यक्षतामा शुक्रबार बसेको बैठकले बिपदमा परेका रोशीका स्थानीयलाई राहत वितरण गर्ने र विपद व्यवस्थापन समिति वडातहसम्म गठन गर्ने निर्णय गरेको हो ।

बैठकले आगामी भदौ १५ गते भित्र रोशी गाउँपालिकाको वडा तहसम्म वडा विपद व्यवस्थापन समिति गठन गर्ने निर्णय गरेको छ । रोशी गाउँपालिकामा १२ वटा वडा रहेकोमा सबै वडामा समिति गठन गरी विपद व्यवस्थापन राहत कोष स्थापना गर्न लगाउने निर्णय भएको गाउँपालिका अध्यक्ष लामाले जानकारी दिनुभएको छ । कोष संकलन गरी विपदमा आवश्यक पर्ने सामग्रीहरू खरीद गरी विपदका लागि तयारी अवस्थामा राख्ने पनि बैठकले निर्णय गरेको लामाले जानकारी दिनुभएको छ ।
वडा-वडामै विपद व्यवस्थापन समिति र विपद व्यवस्थापका लागि प्रयोग हुने सामग्रीको तयारी अवस्थामा राखेमा समयमै उद्धार तथा विपद व्यवस्थापन हुने गाउँपालिका अध्यक्ष लामाले बताउँदै हामीले वडा तहसम्मै विपद व्यवस्थापन समिति गठन गर्ने निर्णय गरेको बताउनुभयो । वडामा विपद पर्दा गाउँपालिकादेखि जाँदा ढिला भैसक्ने भएकाले वडातहसम्म नै समिति गठन गर्ने र उद्धार सामग्री खरितद गरी तयारी अवस्थामा रहने निर्णय गरेका छौँ । जसले गर्दा विपद भैहालेमा धनजनको क्षती कम हुनेछ भन्ने विश्वास आफूले लिएको अध्यक्ष लामाले बताउनुभयो ।
अध्यक्षको थप कथन छ- सोही बैठकले स्थानीय विपद व्यवस्थापन समितिमा परेको निवेदन माथी छलफल गरी राहद रकम उपलब्ध गराउने निणर्य पनि गरेका छौँ । समितिमा १० वटा निवेदन परेकोमा आवश्यकता हेरेर राहत रकम उपलब्ध गराउने निणर्य गरेको लामाले जानकारी दिनुभयो ।
वडा नं. ९ का नेपाल सिं तामाङको केही समय अगाडी गोठ जलेर भैसी र बाख्रा क्षती भएको थियो उहाँलाई राहत रकम उपलब्ध गर्ने समेत बैठकमा जानकारी दिएको छ । त्यस्तै वडा नं. १ का बजेन्द्र कुमार लामाको घर जलेर नष्ट भएको थियो, वडा नं. ५ का साईला तामाङको घर भत्कीएको थियो, वडा नं. ८ की कान्छीमायाँ तामाङको पनि घर भत्कीएको थियो, वडा नं. १ का सन्तमायाँ विकको ३/४ वटा बाख्रा मरेको थियो, वडा नं. ११ का खड्ग बहादुर किंरीङकी छोरी ग्याँस पड्केर घाईते भएकाहरूलाई राहत रकम उपलब्ध गराउने निर्णय गरेको अध्यक्ष लामाको भनाई छ । समितिमा १० वटा निवेदन परेको निवेदनहरूलाई सम्बोधन गर्दै पिडितहरूलाई पूर्ण रुपमा सम्बोधन नभएपनि घाउमा मल्हमको काम गर्नेछ भन्ने विश्वास लिएको अध्यक्ष लामा बताउनुभयो ।