विशेष रुपान्तरणमा भुम्लु पालिकाले अग्रगामी छलाङ पार गरेको छः नेता लक्ष्मी गुरुङ

काभ्रे । ३ महिने विशेष रुपान्तरण अभियान अन्तर्गत भुम्लु गाउँपालिका काभ्रेले अग्रगामी छलाङ पार गरेको संविधान सभा सदस्य एवं नेकपा माओवादी केन्द्रका केन्द्रीय सदस्य लक्ष्मी गुरुङले खुलासा गर्नुभएको छ ।
नेकपा (माओवादी केन्द्र) भुम्लु गाउँपालिकाको १० ओटै वडा कार्यालयको उद्घाटन गर्ने क्रममा उक्त भनाई राख्नुभएको हो । कार्यक्रममा नेकपा (माओवादी केन्द्र) सँग आबद्ध रहेका शुभचिन्तक, क्रियाशील सदस्य तथा नेताहरुको व्यापक जनसहभागिता र उत्साहको साथ वडा पार्टी कार्यालयको उद्घाटन भएको छ ।

घर–घरमा माओवादी जन–जनमा माओवादी भन्ने नाराको साथ जनतासँग माओवादी विशेष रुपान्तरण अभियानको क्रममा भुम्लु गाउँपालिकाको वडा नम्बर १ सापिङमा नेकपा माओवादी केन्द्रका केन्द्रीय सदस्य एवं संबिधान सभा सदस्य गुरुङले व्यानर अनावरण गरि वडा कार्यालय उद्घाटन गर्नुभएको छ । उद्घाटन मन्तव्य राख्दै माननीय गुरुङले माओवादीको वडा कार्यालय अन्य राजनितिक दलको विकृति र विसंगतिको विरुद्ध लड्ने सामाजिक अड्डाको रुपमा स्थापित गरिने बताउनुभएको छ । उहाँ वडा नम्बर १ को कार्यालय उद्घाटन पश्चात वडा नम्बर ८ को वडा कार्यालय उद्घाटन गरेर अभियानलाई निरन्तरता दिनुभएको छ ।
त्यस्तै वडा नम्बर २ सिमथलीमा पार्टी गाउँपालिकाको इन्चार्ज जनक भण्डारीले व्यानर वाचन गरेर वडा कार्यालय उद्घाटन गर्नुभएको छ भने वडा नम्बर ३ बेखसिम्लेको कार्यालय उद्घाटन इन्चार्ज जनक भण्डारी र पालिकाका वरिष्ठ उपाध्यक्ष सुर्यदेब योन्जनले संयुक्त रुपमा व्यानर अनावरण गरी वडा कार्यालय उद्घाटन गर्नुभएको छ । सो अवसरमा माओवादी केन्द्रका जिल्ला सदस्य एवं अखिल नेपाल महिला संघ (क्रान्तिकारी) भुम्लु गाउँपालिकाका अध्यक्ष आशा लामाको समेत उपस्थित रहेको छ ।

त्यसै गरी वडा नम्बर ४ चौबासमा माओवादी केन्द्रका प्रदेश सदस्य नविन तामाङले वडा कार्यालय उद्घाटन गर्नुभएको छ । उक्त उद्घाटन समारोहमा जिल्ला सदस्य हिमाल र पालिका कमिटी कोषाध्यक्ष नम्रता लामाले शुभकामना मन्तव्य राख्नुभएको छ भने पार्टी वडा अध्यक्ष संजय तामाङले कार्यक्रमको सञ्चालन गर्नुभएको हो ।
वडा नम्बर ५ सल्लेमा पालिका उपाध्यक्ष प्रेमा लामाले ब्यानर वाचन गरेर वडा कार्यालय उद्घाटन गर्दै अब माओवादीले भुम्लुमा संस्थागत भ्रष्टाचार र बेतिथिको बिरुद्ध लड्नुपर्ने वताउनुभएको छ । यता वडा नम्बर ६ कोलाँतीको वडा कार्यालय पालिका अध्यक्ष प्रेम बहादुर भुजेलले व्यानर अनावरण गरेर कार्यालय उद्घाटन गर्नुभएको छ । कार्यालय उद्घाटन गर्दै भुजेलले माओवादी कार्यालयमा राजनितिक र सांगठनिक कामको व्यवस्थापन मात्र होइन जनतासँग समधुर सम्बन्ध बढाउने जनसम्पर्क कार्यालयको रुपमा प्रयोग गरिने बताउनुभएको छ । सम्बोधनकै क्रममा भुजेलले वडा नम्बर ७, ९ र १० को समेत वडा कार्यालय उद्घाटन गर्न पाउनु गौरवको विषय भएको बताउनुभएको छ ।
उक्त कार्यक्रममा जिल्ला कमिटी सदस्यद्वय क्रान्ति लामा र सन्त बहादुर तामाङले समेत आ–आफ्नो मन्तव्य राख्नुभएको छ । कार्यक्रममा सहिद परिवारलाई सम्मान गरिएको छ । भुम्लु गाउँपालिकामा नेकपा (माओवादी केन्द्र) सबै वडाहरुमा वडा कार्यालय स्थापना भएका छन् ।