बस र मोटरसाइकल ठोक्किँदा मोटरसाइकल चालक घाइते

काभ्रे । नमोबुद्ध नगरपालिका वडा न. ६ स्थित १ नम्बर पुलमा काठमाडौंबाट सिन्धुलीतर्फ जाँदै गरेको यात्रुबाहक बस र विपरित दिशाबाट आइरहेको मोटरसाइकल एक आपसमा ठोक्किँदा मोटरसाइकल चालक घाइते भएका छन् ।

सिन्धुलीतर्फ जाँदै गरेको ग २ ख १५६३ नम्बरको बस र बाग्मती प्रदेश ०२–०२० प ३७५५ नम्बरको मोटरसाइकल एकआपसमा ठोक्किँदा मोटरसाइकल चालक सप्तरीको सुरुङ्गा नगरपालिका वडा नं २ बर्ष २१ का सुरेन्द्र चौधरीको टाउको र आँखामा चोट लागि गम्भीर घाइते भएको प्रहरीले जनाएको छ भने घाइतेलाई उपचारको लागि धुलिखेल अस्पताल पठाइएको जानकारी दिएको छ । घाइते चौधरीलाई नमोबुद्ध नगर प्रमुख कुनसाङ लामाले आफूले प्रयोग गर्दै आएको सवारीसाधन पठाएर तत्काल उद्धार गरेको जानकारी दिएको छ । गाडी चालक प्रहरी चौकी भकुण्डेवेशीको नियन्त्रणमा रहेको र वी.पी राजमार्गमा यातायात सुचारु भइसकेको प्रहरी चौकी भकुण्डेबेसीले जानकारी दिएको छ ।