काठमाडौं विश्वविद्यालयको स्थापना दिवस तथा दीक्षान्त समारोह हुने

काभ्रे । काठमाडौं विश्वविद्यालयले आफ्नो ३२औं स्थापना दिवस तथा २९औं दीक्षान्त समारोह कार्यक्रम आयोजना गर्ने भएको छ । विश्वविद्यालयले ३२औं स्थापना दिवस मंसिर २५ गते सोमबार र दीक्षान्त समारोह २७ गते बुधबार कार्यक्रम आयोजना गर्न लागेको आज (आइतबार) पत्रकार सम्मेलन गरेर जानकारी गराएको हो ।
स्थापना दिवस समारोहमा विशिष्ट तीन विशिष्ट विद्वानहरूको अभिनन्दन गर्ने विश्वविद्यालयले सम्मेलनमा जनाएको छ । अभिनन्दित हुनेमा काठमाडौं विश्वविद्यालयको चिकित्साशास्त्र विभागका संस्थापक डीन डा. नरेन्द्रबहादुर राणा, जर्मन कला साधक तथा काठमाडौं विश्वविद्यालयको स्कूल अफ आर्टसको सङ्गीत विभागका संस्थापक विभागका अध्यक्ष प्राध्यापक गर्ट माथियास वेग्नर र पूर्वसभामुख दमननाथ ढुङ्गाना रहेका छन् भने सोही समारोहमा डा. न्हुछेरत्न तुलाधरको पुस्तक विमोचन समेत हुने भएको छ ।
काठमाडौं विश्वविद्यालयको २९औं दीक्षान्त समारोह (पहिलो चरण) मा प्रधानमन्त्री तथा कुलपति पुष्पकमल दाहाल ‘प्रचण्ड’ को अध्यक्षता, शताब्दी पुरूष वरिष्ठ चिकित्सक डा. गौरीशंकरलाल दासको प्रमुख आतिथ्यता, शिक्षा, विज्ञान तथा प्रविधिमन्त्री एवं सहकुलपति अशोककुमार राई र शिक्षा, विज्ञान तथा प्रविधि राज्यमन्त्री प्रमिला कुमारीको उपस्थिति रहने सम्मेलनमा जानकारी दिइएको छ ।
उक्त दीक्षान्त समारोहमा काठमाडौं विश्वविद्यालयबाट स्कुल अफ आर्ट्स, एजुकेसन, इन्जिनियरिङ, ल, म्यानेजमेन्ट, मेडिकल साइन्सेज र साइन्स विधाका पीएचडी, डिएम र एमसिएच तहका १८ जना, एमफिल तहका ३८ जना, स्नातकोत्तर तहका ३१४ जना, पिजिडी तहका ५२ जना, र स्नातक तहका १ हजार ४ सय १६ जना सहित जम्मा १ हजार ८ सय ३८ जना विद्यार्थी दीक्षित हुनेछन् ।
ती मध्ये आर्टसका २०९ जना, एजुकेसनका २२५ जना, इन्जिनियरिङका ३९ जना, लका ३९ जना, मेनेजमेन्टका ४४८ जना, मेडिकल साइन्सेजका ७७७ जना र साइन्सका १०१ जना रहनेछन् । दीक्षित हुने विद्यार्थीहरु मध्ये पुरूषको प्रतिशत ४६.०३ (६ सय ४६ जना) तथा महिलाको प्रतिशत ५३.९७ (९ सय ९२ जना ) रहनेछ । दीक्षित हुने मध्ये विदेशी विद्यार्थीहरु ६.१५ प्रतिशत रहेका र तीमध्ये भारत, श्रीलङ्का र माल्दिभ्स गरी ३ देशका ११३ जना विदेशी विद्यार्थी रहनेछन् ।
काठमाडौं विश्वविद्यालयले इतिहासमा पहिलो पटक स्कुल अफ इन्जिनियरिङ अन्तर्गत Master of Technology in Artificial Intelligence मा १ जनालाई, स्कुल अफ मेडिकल साइन्सेज अन्तर्गत Master of Science in Midwifery Nursing मा ८ जनालाई र स्कुल अफ एजुकेसन अन्तर्गत Master in Higher Education मा ९ जनालाई उपाधि प्रदान गर्नेछ । २९औं दीक्षान्त समारोहको पहिलो चरणको कार्यक्रममा काठमाडौं विश्वविद्यालयबाट ४३ हजार १ सय २३ जना उत्तीर्ण भएको जानकारी प्रेस विज्ञप्तिमार्फत दिएको छ ।