महिला सशक्तिकरण

च्वमि– पृष्टा प्रजापति

महिला सशक्तिकरण धका त त सलं भाषण यासां व्यवहारय् आ तक नं छ्यले फगु मखु । महिला छै दुने जक कय्कुना च्वन । आ थीथी थासय् मिसात थ्यंगु खने दुसां पतिंनय् निय्फक्व जक दु । स्युपा जूगु हे मदु धाय्मद्धिं । गुबले जक मिसात आत्मनिर्भर जुया व आत्मनिर्णय याय् फइमखु उबले तक महिला सशक्तिकरण जुइमखु ।
महिला सशक्तिकरणया खं ल्हाय्बले इतिहासय् मदुम्ह योगमायायात लुमंके मा। वय्कः छम्ह मग्याम्ह व साहसीम्ह मिसा खः । मदुम्ह योगमाया राणा शासनया ईलय् विभेदया विरोधय् ल्वाइम्ह न्हापम्ह मिसा जुयादिल । दासप्रथा मदयेकेत, मत्यकं इहिपा याय्गु व लैंगिक हिंसाया विरोधय् अले भात सिनावने धुंका मिसां मेम्हनापं इहिपा याये धाल धाःसा इहिपा याये दय्मा धकाः धयादिल । जातीय विभेद व छुवाछुत अन्त्य जुइमा धका नेतृत्वया भूमिका नं वय्कः निर्वाह यानादिल ।
मदुम्ह योगमायां औपचारिक शिक्षा काय मखंसां समाजय् यक्व दुःख पिडा कुबिया चेतनां जाम्ह मिसा जुयाच्वन । वय्कः स्वःविवेक, स्वःबुद्धि, ध्यान, तपश्या अले साधु सन्तपिनिगु संगतं सभ्य समाज निर्माणया लागि नेतृत्व यानादिल ।
अथेहे मिसातय्सं भोट कुतुंके दयेमा, मिजंतय् थें मिसातय्सं नं ब्वने दयेमा धका सः पिब्वय्गु ज्या नं मिसातय्सं यानावंगु खः। देसय् बहुदल वधुका पार्टी दुने महिला सङ्घ पलिस्था यानाः मिसातय्गु हक हितया लागि सङ्घर्ष यानादिल । राज्यं नीति निर्माण तहखय् मिसातय् सहभागिता चुलाका बिउगु दु । राज्ये मिसातय्त हक अधिकारया खें आपालं बियातसां व हक अधिकार छु खः, गजागु खः धाय्गु मिसातय्सं थुइके फूगु मख् । सत्ताय् च्वंपिं मिजंतय्सं नं थुइके वियेगु कुत मया ।
वंगु चुनावया खं ल्हायेवले मिसात वछिमयाकं दुगु देसय् गठबन्धनं व मेगु पाखें पाच्छिकथं मिसा तय्त कोटा नं मदु, पार्टी दुने च्वंपिं मिसातय्सं छाय् चुइक्क हे न्वमवात ? व ला मिसातय् नं अधिकार दुगु खं खः । नेतृत्व यायेधका वपिं मिसातय्सं विभेदया विरोधय् छाय् सः तयेगु मस्वःत । देसय् गणतन्त्र वयालिं समावेशी सहभागिता जुय्मागु खः । कोटाया व्यवस्था समाजय् ल्युलापिं मिसातय्त बियेमागु खः नि । थीथी थासय् मिसातय्त बराबरया हिस्सा व भागिदार यायेमागु मखुला ? मिसातय्सं छ्या ज्या यानाः च्वंगु दइ । उकिया नं मुल्याङ्कन जुइमा । उमित नं पाग्छिकथं पारिश्रमिक बिइमा । मखुसा महिला सशक्तिकरण गथे जुइ ? मिसातय्गु नीति निर्माण जुइगु थाय् मिसात हे दयेमा ।
समाजं मिसातय्त अवला नारीया रूपय् स्वयेमजिउ । मिसा प्वाथे दुसांतवि घाँय्कु कुबिया, छ्या ज्या सिधय्का, ज्याकुथी वनिपिं नं दु । अले महिला सशक्तिकरणया खै ल्हाय्बले मिजं तयेत कुंखिलय्गु ज्या नं मखु । ब्वयावनेत छपा जक पपु दयां मगा, निपुं पपु मा । अले जक ब्वय्फइ । मिजं व मिसा छम्ह मेम्हसिया ग्वाहालिमी खः । मिसातय्गु भिंगु ज्या खय् मिजंतय्गु नं विमति जुइमखु । उकिं महिला सशक्तिकरण भाषनय् जक सिमित मयासें व्यवहारय् छ्यला यंकेगु हे झीगु आजु पुर्वकेगु खः । सुभाय् ।