खगोलीय पिण्डहरुको पनि अनुसन्धान गरिनुपर्छः रक्षामन्त्री खड्का

काभ्रे । ज्योतिष परिषद् नेपालको रजत वर्षको अवसर पारेर आयोजित कार्यक्रमलाई सम्बोधन गर्ने क्रममा प्रमुख अतिथि नेपाल सरकारका माननीय उपप्रधान तथा रक्षामन्त्री पूर्णबहादुर खड्काले सदैव ज्योतिषहरुलाई फलादेशको रुपमा मात्र नभई खगोलीय पिण्डहरुको पनि अनुसन्धान गर्नुपर्नेमा जोड दिनुभएको छ ।
नेपाल सरकारको तर्फबाट ज्योतिष परिषद्लाई सदैव सहयोग गर्ने धारणा राख्दै आफू ज्योतिष क्षेत्रमा नलागे पनि बिहान विभिन्न सञ्चार माध्यममा आएका राशीफल, वास्तु टिप्स र अन्य फलादेशहरु श्रवण गरेर मात्र दिनको सुरुवात गर्ने धारणा व्यक्त गर्नुभएको छ ।
ज्योतिषीय पेशामा आबद्ध रहेका ज्योतिषहरुलाई सम्मान गरिएको छ । जसमा काभ्रेका ज्यो.पं. प्रमोद भट्टराई, विष्णुप्रसाद तिमल्सिना, हरि पौडेल, दिपक दाहाल, पुष्कर थापा, निर्मला पराजुली भट्टराईलाई सम्मानित गरिएको थियो ।
नेपाल ज्योतिष परिषद्का केन्द्रीय अध्यक्ष प. माधवराज पाण्डेको सभापतित्वमा भएको कार्यक्रममा विभिन्न ज्योतिषविद्हरुले ज्योतिषको बारेमा आफ्नो धारणा व्यक्त गर्नुभएको थियो ।