७४औं वार्षिकोत्सवमा सयौं स्रष्टालाई सम्मानित गर्दै सञ्जीवनी

काभ्रे । धुलिखेल नगरपालिका वडा न ७ धुलिखेलमा अवस्थित श्री सञ्जीवनी नमूना माध्यामिक बिद्यालयले आगामी माघ १६ गते ७४औं वार्षिकोत्सव मनाउने भएको छ ।
आफ्नो स्थापनाको ७४औं वर्षमा बिद्यालयले वार्षिकोत्सव मनाउन लागेको हो । बिद्यालय व्यवस्थापन समितिको निर्णयानुसार उक्त अवसरमा उत्कृष्ट योगदान पु¥याउने सम्पूर्ण विधाका व्यक्तित्व जनहरुलाई भव्य कार्यक्रमका बिच सम्मान गर्ने निर्णय समेत गरेको छ ।
शिक्षाको क्षेत्रमा दर्बिलो इतिहास रचेको सञ्जीवनी नमूना माध्यमिक विद्यालयले धुलिखेलको इतिहास बोकेको मात्र नभई राष्ट्रको दक्ष जनशक्ति उत्पादन गर्नमा ठूलो योगदान रहेको यस विद्यालयले आफ्नो ७४औं वार्षिकोत्सव मनाउन लागेको हो । आफुले तत्कालिन अवस्थामा औपचारिक शिक्षा नलिए पनि ७४ वर्ष अघिका राम्रो शिक्षाको महत्व बुझेका शिक्षाप्रेमी, अग्रणी ती अभिभावकहरुलाई यस विद्यालयले कहिल्यै पनि भुल्ने छैन र भुल्नु पनि हुँदैन भन्दै बैठकले ति स्रष्टाहरुप्रति सम्झने र सकेसम्म सम्मान समेत गर्ने छलफलले निर्णय गरेको छ ।
बि.सं. २००६ साल देखि हाल सम्मको यस अवधिमा यो विद्यालयले धेरै घुम्तीहरु पार गरेको छ । स्थानीय जनसमुदायको सक्रियता, मेहनती शिक्षक, लगनशील विद्यार्थी, सरकारको निर्देशन, अनुगमन र सही मुल्यांकनबाट नै यो विद्यालय पटक पटक नमुना विद्यालयको रुपमा सुचिकृत भएको हो ।
हाल विद्यालयमा साधारण शिक्षाका अतिरिक्त कक्षा ९ बाट नै सिभिल इन्जिनियरिङ्ग जस्तो सीपयुक्त प्राबिधिक विषय अध्यापन गराई विद्यालयले नेपाल सरकारको नीति अनुसार नै मध्यम स्तरको जनशक्ति उत्पादन गरि राष्ट्र सेवामा लगाई रहेको छ । बढ्दो विद्यार्थी संख्या, भौतिक सुबिधा बिस्तार, शिक्षण पद्दतिमा नविनता, नतिजामा सुधार, अभिभावकको विश्वास, शिक्षकहरुको लगनशीलता र तीनै तहका सरकारको सहयोग नै विद्यालय सफलताका आधार हुन् । यिनै आधारलाई अझै मजबुत बनाउदै विद्यालयको गरिमालाई अक्षुण राख्न स्थानीय जनसमुदाय, अभिभावक, शिक्षक, विद्यालय सरोकारवालाहरु सबैको सहयोग र सर्मथनलाई अझ सुदृढ गर्न सकियोस् भन्ने शुभकामना व्यक्त समेत गर्दै बैठकले उक्त दिन शहिद दिवस पनि परेको हुँदा सम्पूर्ण शहिदहरुप्रति सम्मान समेत व्यक्त गरेको छ ।
सो वार्षिकोत्सवलाई सभ्य र भव्य रुपमा सम्पन्न गर्नका लागि बिद्यालय व्यवस्थापन समिति अध्यक्ष वेदप्रसाद कोजूको संयोजकत्वमा शिक्षक अभिभावक संघका अध्यक्ष महेन्द्रविक्रस शाह, प्राचार्य लोकेन्द्र ढकाल लगायत सम्पूर्ण शिक्षक, अभिभावक, विद्यार्थीहरुको अपनत्व झल्कने गरी कार्यक्रम सञ्चालन गर्ने निर्णय समेत भएको सहायक प्रधानाध्यापक टंक थापाले जानकारी गराउनुभएको छ ।
उक्त वार्षिकोत्सव कार्यक्रमलाई सभ्य, भव्य र उल्लासमय वातावरणमा सम्पन्न गर्नका लागि प्राचार्य ढकालको नेतृत्वमा विभिन्न उपसमितिहरु गठन भएका छन् । जसमा जसले मञ्च व्यवस्थापन, प्रमुख अतिथि र अतिथि व्यवस्थापन, पुरस्कार व्यवस्थापन, सम्मान व्यवस्थापन, खाजा व्यवस्थापन, कार्यक्रम सञ्चालन, एनसीसी र राष्ट्रपति रनिङ शिल्डमा उत्कृष्ट परिणाम हासिल गर्ने विद्यार्थीहरुलाई उच्च सम्मान लगायतका कार्यक्रमको जिम्मेवारी बाँडफाँड गरिएको प्राचार्य ढकालले जानकारी गराउनुभएको छ ।