केही व्यक्तिको नीजि स्वार्थका कारण सीमा समस्या जटिल बन्दै गएको छः अध्यक्ष भुजेल

भुम्लु । भुम्लु गाउँपालिकाका अध्यक्ष प्रेमबहादुर भुजेलले अनुगमनका क्रममा आफ्नो पालिका आइपुगेका जिल्ला समन्वय समिति र जिल्ला सुरक्षा निकाय सामु साँगाचोकगढी नगरपालिका चौतारा र भुम्लु गाउँपालिका काभ्रेबीच सीमा विवादका बारेमा जानकारी गराउँदै यो समस्यालाई भुम्लु गाउँपालिकाको मात्र समस्या नसम्झी समग्र जिल्लाको समस्याको रुपमा लिईदिनुहुन आग्रह गर्नुभएको छ ।
सीमा विवादका बारेमा जिल्ला प्रशासन, प्रदेश सरकार र संघीय सरकारसम्म विधिवत् रुपमा जानकारी गराइसकिएको स्मरण गराउँदै तत् निकायले खेल्नुपर्ने भूमिकामा कमी कमजोरी आउने छैन भन्ने विश्वास आफूले लिएको चर्चा गर्नुहुँदै यो सीमा विवादको समस्याले भाइचारामा समेत अड्चन आउन सक्ने परिस्थिति सिर्जना भएको तर्फ जानकारी गराउँदै यसको समाधानका लागि सबै सरोकारवाला निकायलाई एउटै थलोमा राखेर समाधान खोज्ने प्रयास भइरहेको खुलासा सुरक्षा संयन्त्र, जिल्ला समन्वय समिति र सञ्चारकर्मी माझ गर्नुभएको छ ।