रेडक्रसको सिद्धान्तलाई व्यवहारमा उतार्नु नै मानवीय धर्म होः अध्यक्ष दाहाल

पनौती । नेपाल रेडक्रस सोसाइटी टौखाल उपशाखाको वार्षिक साधारण सभालाई सम्बोधन गर्ने क्रममा पनौती नगरपालिका वडा नं. ४ का वडा अध्यक्ष दीपक प्रसाद दाहालले रेडक्रसको सिद्धान्तलाई व्यवहारमा उतार्नु नै मानवीय धर्म भएको बताउनुभएको छ ।
रेडक्रसको जन्म हुँदाका ति दिनहरुको स्मरण गर्दै हेनरी ड्युनाले जसरी रेडक्रसको स्थापना गरेर विश्वमा शान्तिको सन्देश प्रवाह गर्न सफल हुनुभएको छ, त्यसैगरी रेडक्रसप्रति जनमानसको आकर्षण बढ्नुको पछाडि उसको स्थापनाकालका घटनाक्रमले महत्वपूर्ण भूमिका खेलेको र रेडक्रसप्रति आस्था राख्नेहरुको व्यवहार पनि त्यही अनुसार भएकै कारण आज रेडक्रस सबैको आकर्षणको केन्द्र बनेको छ । यो महिमा र भावनालाई व्यवहारमा उतार्नु तपाईं हामी रेडक्रसकर्मीहरुको धर्म हो । मानवीय संवेदनशीलता कुनै संस्थामा छ भने त्यो रेडक्रसमा छ । सोही मर्मलाई आँच आउन नदिनका लागि पारदर्शी ढंगबाट रेडक्रस जस्ता मानवीय संस्थाहरुलाई स्थानीयस्तरमा स्थापित गराउने मूल दायित्व रेडक्रससँग आबद्ध रहेका रेडक्रसकर्मीहरुको हो । आज जति पनि मानवीय सेवाका कुराहरु आउँछन्, त्यहाँ रेडक्रसको नाम जोडिएको हुन्छ भन्नुहुँदै अध्यक्ष दाहालको थप कथन छ– उपशाखाहरुले आफ्नो जिम्मेवारी गम्भीरतापूर्वक पूरा गर्न सकिएन भने संस्थाप्रति नै गम्भीर प्रश्नहरु उठ्न सक्छन् । त्यसतर्फ चनाखो हुँदै संस्थालाई चलायमान बनाउनु प्रत्येक आजीवन सदस्यको जिम्मेवारी रहेको बताउनुभएको छ । कार्यक्रममा कार्यसमिति उपसभापति मिरा पौडेल, सचिव अक्कलसिं थापा, कोषाध्यक्ष सुरेन्द्र तामाङ, कार्यसमिति सदस्य इश्वर बञ्जारा, कार्यपालिका सदस्य राधिका विश्वकर्मा लगायतले उपशाखाको गतिविधिका बारेमा चर्चा गर्नुभएको थियो ।
वार्षिक साधारण सभामा उपशाखाको प्रगति प्रतिवेदन सचिव अक्कलसिं थापाले राख्नुभएको थियो भने कोषाध्यक्ष सुरेन्द्र तामाङले आर्थिक प्रतिवेदन राख्नुभएको कार्यक्रमको सभापतित्व उपशाखाका सभापति नकुल श्रेष्ठले गर्नुभएको थियो ।