सामाजिक अभियान्ताको मर्मलाई लत्याउनु मानवीय अपराध हो ः पौडेल

पनौती । “कुरा होइन, काम गरौं, सेवा गरी पुण्य कमाऔं” महिला सशक्तिकरणका लागि महिला भन्ने मूल मर्मका साथ स्थापित भएको सहयोगी मनहरु नामक संस्था खोलेर सामाजिक अभियानमा जुट्नुभएका मिरा पौडेलले पनौती नगरपालिकाभित्रका १२ वटै वडामा पुगेर सामाजिक संस्थाको महिमा स्थापित गर्दै सामाजिक अभियान्ताको मर्म लत्याउने काम पछिल्लो समय अभियान्ताहरुबाटै भएकोमा दुःख व्यक्त गर्नुभएको छ ।
मंगलबार पनौती नगरपालिका वडा नं. ४ मा रहेको पशुपति मन्दिर परिसर सरसफाई गर्ने क्रममा भेटिनुभएका पौडेलले गैससहरु कागज र प्रतिवेदनमुखी बन्नु अभिशाप रहेको समेत बताउनुभएको छ । सामाजिक संस्थाका नाममा बजारमा जन्मिएका गैससहरुलाई चुनौतीका रुपमा उदाएको सहयोगी मनहरुले गरेको सामाजिक सेवालाई मुक्तकण्ठले सम्मान व्यक्त नगर्ने बिरलै होलान् । कार्यक्रममा कुनै तडकभडक पाइन्न । जुन उद्देश्यको लागि जुटेको हो, त्यसैमा एक मत हुन पुग्छन् सहयोगी मनहरुमा जोडिएका आत्माहरु । त्यहाँ को ठूलो, को सानो कुनै अर्थ राख्दैन । राख्छ त केवल सामाजिक सेवाको उद्देश्य स्थापना गरेर समाजलाई एउटा नयाँ सन्देश दिनु । दिन प्रतिदिन सामाजिक भावनाहरु हराउँदै गइरहेको आजको अवस्थामा सहयोगी मनहरुले जुटाएको एक्येबद्धतालाई नेपाल रेडक्रस सोसाइटी टौखाल उपशाखा, पनौती नगरपालिका वडा नं. ४ परिवार र लायन्स क्लब अफ काठमाडौं पूर्वक्षितिज काभ्रे ३२५ आइ नेपालको सहकार्यले उर्जा थपेको सामाजिक अभियान्ता मिरा पौडेलको तर्क थियो ।

वडाभित्र हुने जुनसुकै सामाजिक कार्यमा नछुट्ने पात्र हुन् वडा नं. ४ का वडा अध्यक्ष दीपक प्रसाद दाहाल । उहाँले यो ठूलो, यो सानो, यो राम्रो, यो हाम्रो कहिल्यै हेर्नुभएन । उहाँको नजरमा सेवा नै धर्म हो । सामाजिक दायित्वबाट कहिल्यै विचलित नहुने पात्रका रुपमा आफूलाई स्थापित गर्न सफल वडा अध्यक्ष दाहाल कुटो, कोदालो, कुचोमा रुमलिरहँदा अन्य दिग्गज वर्गका रुपमा आफूलाई हेर्नेहरु गफिरहँदा आफैंलाई असहज महसुस गरेको प्रष्टै अनुभूति गर्ने अवसर मंगबार पनौतीको पावन भूमि पशुपति मन्दिर परिसरमा सरसफाईमा जुटेका अभियान्ताहरुबिचमा मिलेको थियो । यसले पनि सामाजिक दायित्व कस्तो हुन्छ भन्ने प्रेरणा वडा अध्यक्ष दाहालबाट सिक्नुपर्ने सन्देश सो कार्यक्रमले दिएको छ । झण्डै २ सयको हाराहारीमा सहभागी सहयोगी मनहरुको उल्लासमय उपस्थिति र सक्रियतामा मन्दिर परिसर वरिपरि सरसफाई भएको छ । त्यसका लागि यो पंक्तिकारको तर्फबाट आयोजक सहयोगी मनहरुप्रति साधुवाद छ ।