रोटरी क्लब अफ धुलिखेलको जिम्मेवारीमा सैंजू

काभ्रे । रोटरी क्लव अफ धुलिखेल, रोटरी इन्टरनेशनल ३२९२ को २७ औ पदस्थापन समारोह धुलिखेलमा सम्पन्न भएको छ ।
कार्यक्रमका प्रमुख अतिथी एवं पूर्व डिष्ट्रीक्ट गभर्नर  रविन्द्रमान पियाले रोटरीको मर्म र भावना अनुसार कार्य गर्न नयाँ समितिलाई शुभकामना दिँदै पुरानो समितिले गरेका कार्यहरुको प्रसंशा गर्नुभएको छ ।

पदस्थापन कार्यक्रममा वर्ष २०२४/२०२५ की अध्यक्ष ज्योत्सना सैंजुको अध्यक्षता गर्दै आगामी कार्यक्रमका बारेमा जानकारी गराउनुभएको छ । रोटरीले लिएको उद्देश्य र लक्ष्य प्राप्तिमा निरन्तर सक्रिय हुने प्रतिवद्धता ब्यक्त गर्नुभएको छ ।
निवर्तमान अध्यक्ष कमला श्रेष्ठले आफ्नो कार्यकालमा भएका महत्वपूर्ण गतिविधीहरुका बारेमा जानकारी गराउनुभएको छ ।
रोटरी क्लवले यो पल्ट बिभिन्न सामाजिक कार्यमा तल्लिन महानुभावहरूलाई पुरस्कार प्रदान गरेको छ । कार्यक्रममा रोटेरियन शिव बहादुर नेपाली प्रधानले आफ्नो बुवाको सम्झनामा २ जना विद्यार्थीलाई छात्रवृत्ति प्रदान गर्नुभएको छ । जसमा सञ्जिवनी स्कुल धुलिखेलबाट एसईईमा उत्कृष्ट आरोषा मानन्धर र हिमालय स्कुल बनेपाका विद्यार्थी मनिका चौंधरीलाई १० हजार र १२ हजार प्रदान गरिएको छ ।
त्यस्तै धावक पुष्प लाल श्रेष्ठलाई ६५ बर्षको १० हजार मीटर बिधामा बंगलादेशमा भएको दौड़मा प्रथम हुनुभएकोमा कदर पत्र प्रदान गरेको छ । रोटरी भोकेशनल पुरष्कार स्वरूप हरि मंजुश्रीलाई रू १५ हजार, अरुण सैंजूलाई दैबिक प्रकोपमा राम्रो कार्य गरेको बापत  १०० हजार, सुमित्रा बंजारालाई पनौतीको पुण्यमाता खोलामा अनवरत रूपमा सरसफाई गरेर वातावरण अनुकुल कार्य गरे बापत  १५ हजार नगद पुरस्कार प्रदान गरेको छ ।

कार्यक्रममा धुलिखेल नगरपालिका प्रमुख अशोक ब्याञ्जुले धुलिखेल नगरपालिकाले दीगो विकास लक्ष्यका सुचकहरु पुरा गर्ने अभियानमा नगरपालिका सबै क्षेत्रसँग साझेदार गर्न तयार रहेको बताउनुभएको छ ।सम्बोधनकै क्रममा काठमाडौं बिश्व बिद्यालयका उपकुलपति प्रा. डा. भोला थापाले विकासको मोडल परिवर्तन गर्नु पर्ने आवश्यकता भएको बताउँदै हरेक क्षेत्रमा सक्रियता पुर्वक कार्य गर्न नयाँ नेतृत्वलाई बधाई तथा शुभकामना दिनुभएको छ ।
कार्यक्रममा रोटरीका एजि छन्दप्रसाद आचार्य, सचिव लक्ष्मण लामा लगायतले धुलिखेल रोटरीका गतिविधीका बारेमा जानकारी गराइएको थियो भने धुलिखेल रोटरीमा आवद्ध भएका नयाँ सदस्यहरुलाई स्वागत गरिएसँगै रोटरीद्वारा प्रकाशन गरिएको अरनिको स्मारिका विमोचन समेत गरिएको थियो ।