कडा प्रतिस्पर्धाका बिच काभ्रे बारको अध्यक्षमा हरिशरण

काभ्रे । नेपाल बार एशोसिएसन काभ्रे इकाईको शनिबार सम्पन्न निर्वाचनमा आफ्ना प्रतिद्वन्द्वी जयराम थापालाई एक मतले पछि पार्दै हरिशरण दाहाल अध्यक्षमा निर्वाचित भएका छन् ।
हरिशरण दाहालले नेपाली काँग्रेस निकट जयराम थापा समुहलाई एक मतले पराजित गरेका हुन् । दाहाललाई एमाले, माओवादी, बैद्य समुह तथा नेपाली काँग्रेसको विद्रोही समुहले समर्थन गरेको थियो ।
नेपाली कांग्रेस निकट उम्मेदवार थापालाई एकीकृत समाजवादी निकट कानून ब्यवसायीहरु, नेकपा माओवादीको आधिकारिक समर्थन थियो । केही स्वतन्त्र कानून ब्यवसायीहरु दुवैतर्फ विभाजन भएका थिए । यता हरिशरण दाहालको समुहमा नेपाली काँग्रेस निकट विद्रोही कानून व्यवसायी, माओवादी निकट विद्रोही कानून व्यवसायी र स्वतन्त्र कानून व्यवसायीहरुको समर्थन रहेको थियो । जसमा कांग्रेस निकट निरोजप्रसाद नेपाल उपाध्यक्षमा, सचिवमा माओवादी निकट नारायणध्वज तामाङ, कोषाध्यक्षमा मुकुन्द मुनाकर्मी, सह सचिव लालतारा अधिकारी निर्वाचित भएका छन् ।
त्यस्तै सदस्यहरुमा सुरज तिमल्सिना, सुविस्ता जोशी, दिपेन्द्र दनुवार, सुरेशकुमार केसी, राजेन्द्र पण्डित, उमा थापा निर्वाचित भएका छन् भने जयराम थापा समुहबाट रमिता मानन्धर र महेन्द्र थिङ निर्वाचित भएका छन् । पार्षदमा विजयभक्त श्रेष्ठ, श्यामकृष्ण खत्री, कुमारप्रसाद भट्टराई, फडिन्द्र कार्की, कुमार थापा र रामप्रसाद मानन्धर निर्वाचित भएका छन् ।
मतदानका लागि १ सय २३ सदस्यीय मतदाता सूची सार्वजनिक भए पनि १ सय १५ खसेको थियो । अध्यक्ष, उपाध्यक्ष, सचिव, सह सचिव, कोषाध्यक्ष सहित १३ सदस्यीय कार्य समिति र ६ जना केन्द्रिय पार्षदमा निर्वाचित भएका छन् । बार एशोसिएसन काभ्रेमा नेपाली काँग्रेस निकट ४३, नेकपा एमाले निकट ३४, नेकपा समाजवादी निकट १५, नेकपा माओवादी निकट १०, बैद्य समुह निकट ८ र स्वतन्त्र १३ कानून ब्यवसायी आबद्ध छन् ।
पुर्व अध्यक्ष कृष्णप्रसाद सापकोटाको अध्यक्षतामा प्रदिप सापकोटा र प्रतिभा खत्री रहेको निर्वाचन समिति गठन गरिएको थियो । सोहि समितिले निर्वाचन गराएको थियो ।