अभियानको रुपमा शीर मेमोरियलमा रक्तदान

काभ्रे । कोही रगतबिना तड्पिन नपरोस् भन्ने महान् उद्देश्यका साथ रक्तदान जीवनदान भन्ने मूल्य, मान्यता र नारालाई आत्मसात गर्दै प्रत्येक ३÷३ महिनामा आफ्नै अस्पतालको हाताभित्र रक्तदान कार्यक्रम गर्दै आएको शीर मेमोरियल एड्भेटिष्ट अस्पतालले आइतबार पनि रक्तदान कार्यक्रम सम्पन्न गरेको छ ।
अस्पतालका सिईओ डा. हेक्टर गायरसको उपस्थितिमा रक्तदान कार्यक्रम शुभारम्भ गरी कार्यक्रमको निरन्तरतालाई अगाडि बढाएको हो । यस किसिमको मानवीय सेवाले अस्पतालमा आइपर्ने र रगत अभावलाई केही मात्रामा रगतको पूर्ति गरेको सिईओ डा. हेक्टरले बताउनुभएको छ । यो अभियानलाई निरन्तरता दिँदै जाने लक्ष्य रहेको संवादका क्रममा बताउनुभएको छ ।
कुनै पनि किशोरकिशोरीहरुले आफ्नो जन्मदिनलाई रक्तदान गरेर मनाइदिने संस्कारको विकास गराउन सकियो भने रगतको अभावबाट कसैले पनि जीवन गुमाउन नपर्ने सिईओ डा. हेक्टरको कथन छ । रक्तदान सम्बन्धी जनचेतनाको अभावले यो समस्या आएको हो । यदि रक्तदानका बारेमा भुईंमान्छेसम्म चेतना फैलाउन सकियो भने रगत अभावका समस्याहरु नआउने जिकिर समेत सिईओ डा. हेक्टरले व्यक्त गर्नुभएको छ । रक्तदान सम्बन्धी चेतनामूलक अभियान कुनै निकायले सञ्चालन गर्छ भने शीर मेमोरियल एडभेटिष्ट अस्पताल हातेमालो गर्न सदैव तयार रहेको समेत संवादका क्रममा सिईओ डा. हेक्टरले बताउनुभएको छ ।