आफ्नो विरासत जोगाउन सफल पनौती नगरपालिका

सन्दर्भः १६औं राष्ट्रपति रनिङ शिल्ड खेलकुद प्रतियोगिता–२०८१

बनेपा । जिल्ला खेलकुद विकास समिति काभ्रेको आयोजनामा १६ औं राष्ट्रपति रनिङ शिल्ड खेलकुद महोत्सव प्रतियोगिता–२०८१ गत ९ गतेबाट बनेपामा सुरु भई ११ गते सम्पन्न भएको छ । बागमती प्रदेश सरकारका मुख्यमन्त्री बहादुर सिंह लामाले खेलकुद महोत्सव उद्घाटन गर्नुभएको प्रतियोगितामा पनौती नगरले आफ्नो विरासतलाई जीवन्त राख्दै यो वर्ष पनि राष्ट्रपति रनिङ शिल्डमा कब्जा जमाएको छ ।
मुख्यमन्त्री लामाले उद्घाटन मन्तव्य राख्नुहुँदै खेल क्षेत्र प्रदेश सरकारको विशेष प्राथमिकतामा रहेको बताउनुभएको छ । स्वस्थ जीवनयापनको लागि समेत खेल महत्वपुर्ण रहेको बताउनुहुँदै खेलले अनुशासन सिकाउने र प्रतिस्पर्धी भावना जागृत गराउँदै भावनात्मक सम्बन्ध विकास गराउने भनाई उहाँले राख्नुभएको हो । यसअघि खेल क्षेत्र प्राथमिकतामा नपरेको मुख्यमन्त्री लामाले स्विकार गर्नुहुँदै अहिले प्रदेश सरकारले पुर्वाधार विकासमा जोड दिएको बताउनुभएको छ । खेलकुदले पर्यटन क्षेत्रलाई समेत फाईदा पुग्ने बताउनुहुँदै पोर्चुगल, इन्डिया जस्ता देशको आर्थिक उन्नतिमा खेलकुद पनि प्रमुख कारक रहेको बताउनुभएको छ ।
मुख्यमन्त्री लामाले प्रसंग बदल्दै विपद्ले काभ्रेपलाञ्चोक जिल्ला सबैभन्दा बढी क्षतिग्रस्त भएकोले समपुरक बजेटमा पुनर्निर्माणको लागि बजेट छुट्याएको जानकारी दिनुहुँदै रोशी नदीबाट हुने कटान रोक्न बहुवर्षे योजनामा समावेश गरिएको पनि सो अवसरमा बताउनुभएको छ ।
उद्घाटन कार्यक्रममा बागमति सरकारका पुर्व खानेपानी तथा सिंचाइमन्त्री एवम् प्रदेश सभा सदस्य तिर्थ लामाले सबैभन्दा धेरै विकास प्रदेश सरकार र स्थानीय सरकारले गरेको दाबी गर्नुभएको छ ।

त्यस्तै वागमती प्रदेशसभा सदस्य एवं प्रमुख सचेतक तथा पुर्व खेलकुद मन्त्री रत्न ढकालले खेलकुदको विकासमा कोही सत्तापक्ष र प्रतिपक्ष नहुने बताउनुभएको छ । सम्बोधनकै क्रममा प्रदेश सभा सदस्य रुकु चौंलागाईंले खेलकुदको विकासको लागि पर्याप्त बजेट विनियोजन गर्न प्रदेश सरकारलाई माग गर्नुभएको छ । जिल्ला समन्वय समिति काभ्रेका प्रमुख दिपक गौतमले खेलको विकासविना देशको विकास नहुने ठोकुवा समेत गर्नुभएको छ ।
प्रतियोगितामा बनेपा नगरपालिकाका नगर प्रमुख शान्तिरत्न शाक्यले खेलको विकासको लागि नगरले लगानी गरिरहेको जानकारी गराउँदै भौतिक पुर्वाधार निर्माणको लागि थप बजेट राखिदिन प्रदेश सरकारलाई अनुरोध गर्नुभएको छ भने बनेपा नगरपालिका ६ का वडाध्यक्ष तथा जिल्ला खेलकुद विकास समितिका पुर्व अध्यक्ष सचितानन्द केसीले आफ्नै पालामा जग्गा उपलब्ध गराई कबर्ड हल र जिल्ला खेलकुद विकास समितिको भवन निर्माण गराउन सफल भएको जानकारी दिनुभएको छ । खेलकुद परिषद्का सदस्य सचिव दिपक लामा, भेषराज शाह लगायतका वक्ताहरुले मन्तव्य राख्नुहुँदै खेलकुदको महत्वबारे चर्चा गरेका छन् । जिल्ला खेलकुद विकास समितिका अध्यक्ष मानविर वाइवाको अध्यक्षतामा सम्पन्न प्रतियोगितामा कार्यालय प्रमुख बलराम शर्माले कार्यक्रम सञ्चालन गर्नुभएको थियो ।
उद्घाटन समारोहमा विभिन्न विद्यालयका विद्यार्थीहरुले साँस्कृतिक प्रस्तुती गरिएको कार्यक्रममा १३ वटै पालिकामा उत्कृष्ट भएका विद्यालयका विद्यार्थीहरुले सहभागिता जनाएका थिए ।
राष्ट्रपति रनिङ्ग शिल्डको विद्यामा समावेश भएका खेलहरुका अतिरिक्त कराँतेका विभिन्न विधा समेत समावेश गरिएका थिए । यो खेलकुद महोत्सवमा जिल्लास्थित खेलकुद संघबाट समेत खेलाडीहरुको सहभागिता रहेको थियो । खेलकुद महोत्सवमा सहभागि भई खेलको माध्यमबाट जिल्लालाई पहिचान गराउन, खेलाडीहरुको मनोबल उच्च बनाउन र ब्यवसायीक रुपमा खेललाई अघि बढाउन खेलकुद महोत्सव आयोजना गरिएको र करीब ७ सय खेलाडीहरुको प्रत्यक्ष सहभागी रहेको जिल्ला खेलकुद विकास समितिका अध्यक्ष वाइवाले जानकारी गराउनुभएको छ ।
समापन कार्यक्रममा विजयी खेलाडीहरुलाई बनेपा नगरपालिकाका प्रमुख शाक्यले शिल्ड, प्रमाणपत्र र पदकहरु वितरण गर्नुभएको छ । प्रतियोगितामा पनौती नगरपालिका ५४ स्वर्ण पदकमध्ये १७ स्वर्ण, ५४ रजत पदकमध्ये १७ रजत र ८२ कास्य पदकमध्ये १७ कास्य पदक प्राप्त गर्दै प्रथम भएको छ । त्यसैगरी पाँचखाल नगरपालिका १० स्वर्ण पदक, १२ रजत पदक, १२ कास्य पदक प्राप्त गरी द्वितीय भएको छ भने ६ स्वर्ण पदक, ५ रजत पदक, ३ कास्य पदक प्राप्त गरी मण्डनदेउपुर नगरपालिका तृतीय स्थान प्राप्त गरेको छ । त्यस्तै अन्य सहभागी पालिकाहरुमा भुम्लु गाउँपालिका ६ स्वर्ण पदक, ३ रजत पदक, ८ कास्य पदक, बनेपा नगरपालिका ५ स्वर्ण पदक, ५ रजत पदक, ८ कास्य पदक, धुलिखेल नगरपालिका ४ स्वर्ण पदक, १ रजत पदक, ४ कास्य पदक, महाभारत गाउँपालिका २ स्वर्ण पदक, २ रजत पदक, ६ कास्य पदक, चौंरीदेउराली २ स्वर्ण पदक, ५ रजत पदक, ९ कास्य पदक, खानीखोला गाउँपालिका १ स्वर्ण पदक, १ रजत पदक, २ कास्य पदक, बेथानचोक गाउँपालिका १ स्वर्ण पदक, १ रजत पदक, नमोबुद्ध नगरपालिका २ रजत पदक र रोशी गाउँपालिका १ कास्य पदक प्राप्त गरेको जिल्ला खेलकुद विकास समिति काभ्रेपलाञ्चोकले उपलब्ध गराएको तथ्यांकबाट जानकारी भएको छ ।
स्मरण रहोस्, यो १६औं राष्ट्रपति रनिङ शिल्ड खेलकुद महोत्सव प्रतियोगिता–२०८१ मा तेमाल गाउँपालिकाले सहभागिता जनाएको छैन भने अन्य पालिकाहरुमा पनि आफूलाई उपल्लो पालिकाको पदवी दिन रुचाउने पालिकाहरुले खेलाडीहरुलाई एउटा टि–सर्ट सम्म उपलब्ध नगराउनुले खेलाडीहरुमा नैराश्यता उत्पन्न भएको जो कोहि खेलकुदप्रेमीहरुले अनुमान लगाइरहेका थिए ।
खेलकुद महोत्सवमा सहभागी खेलाडीहरुको व्यवस्थापन अत्यन्तै कमजोर रहेको थियो । खेलाडीहरुलाई एउटा सेल, एउटा समोसा खाजाको रुपमा उपलब्ध गराइएको तिर्खा नमेटिने गरी पानी समेत पिउन नपाउँदा पनि खेलाडीहरुले आफ्नो कुशलता प्रस्तुत गरेर पालिकाको नाम उच्च राखिदिएका छन् । धन्य छ, ति पालिका जसले खेलाडीहरुको र खेलकुदको महत्वलाई बुझ्न सकेनन् । तरपनि खेलाडीहरुले जुन किसिमको कुशलता प्रस्तुत गरेर उदाहरणीय कार्य गरे, त्यसका लागि समग्र दर्शकतर्फबाट धन्यवाद पाउनु आफैंमा गौरवको विषय भएको छ । त्यस्ता पालिकाहरुले सहभागिता नजनाइदिँदा के फरक पर्छ ? खेल खेल्नका लागि पूर्ण तयारीका साथ मैदानमा ओर्लिएका खेलाडीहरु खेल्नबाट बञ्चित हुनुले ति खेलाडीहरुमा कस्तो चोट पुग्छ ? र त्यो पालिकाप्रति ति खेलाडीहरुको बुझाइ कस्तो हुन्छ ? यहाँ भनिराख्न नपर्ला । आगामी दिनमा कुनै पनि पालिकाले आफ्ना खेलाडीहरुलाई बेवारिसी ढंगबाट नपठाउन् भन्ने आम दर्शकको सुझाव छ ।