बेथानचोक गाउँपालिकामा कोशेली घर संचालन

ढुंखर्क/ बेथानचोक गाउँपालिकाले कोशेली घर संचालनमा ल्याएको छ । आइतबार वागमती प्रदेशका सामाजिक विकास मन्त्री कञ्चनचन्द्र बादेले यसको उद्घाटन गर्नुभएको हो । यससँगै बेथानचोकका उद्यमी महिलाहरु आफूले उत्पादन गरेका सामाग्री कोशेली घरबाट बेच्न पाउने भएपछि खुशी भएका छन् ।

हरेकजसो पालिकाहरुले आफ्नो पालिकामा महिलालक्षित विभिन्न कार्यक्रमहरु संचालन गरिरहेका छन् । विशेषगरि महिलाहरुलाई आत्मनिर्भर बनाउने उद्देश्यले उनीहरुलाई सीप सिकाउँदै स्वरोजगार बनाउने उद्देश्यले यस्ता व्यवसायतर्फ प्रेरित गराउने उनीहरुको लक्ष्य छ । सीप त सिक्यो, उत्पादन पनि गर्यो तर उत्पादित सामाग्रीहरुको बजार छैन । घरमा उपयोग गरेर सम्भव पनि छैन र बजार लैजान गाउँका महिलाका लागि धेरै समस्या पनि छन् । यही समस्याको समाधानका लागि जन्मिएको हो कोशेली घर ।

काभ्रेको बेथानचोक गाउँपालिकाले पनि आफ्ना ६ वटै वडामा रहेका महिलाहरुका लागि धेरै कार्यक्रमहरु ल्याएको छ । ढाकाका कपडा बुनाइ, बाँसका सामान बनाउने तालिम, सिलाईबुनाईदेखि कृषिका विभिन्न आयामहरुका कार्यक्रम पनि संचालन गरिरहेको पालिकाले अब यही कोशेली घरबाट ती उत्पादित सामानहरु बेच्न सक्ने गरि कोशेली घरको परिकल्पना गरेको छ । उद्यमीहरुले सामानहरु पालिकालाई बेच्न दिएर बजारको समस्या समाधान हुने विश्वास गरिएको पालिका अध्यक्ष भगवान अधिकारीले बताउनुभयो ।

गृहिणी महिलालाई आर्थिक उपार्जनका लागि सहयोग हुने गरि कोशेली घर संचालनमा ल्याइएको गृहिणी महिला सशक्तिकरण कार्यक्रमकी संयोजक अम्बिका खरेलले बताउनुभयो । तालिमबाट सीप सिकेका महिलाहरुले उत्पादन गरेका सामाग्री अब कोशेली घरबाटै बिक्री गरिने हुँदा उद्यमीहरुले बजारको समस्या झेल्नु नपर्ने भएको छ । यहाँ उद्यमीबाट सामान किन्न र कोशेली घरबाट बेच्नका लागि मूल्य पनि निर्धारण गरिएको थियो ।

गृहिणी महिला सशक्तिकरण कार्यक्रम वागमती प्रदेश सरकारको एउटा महत्वपूर्ण कार्यक्रम हो । यो सामाजिक विकास मन्त्रालय अन्तर्गत संचालित छ । गृहिणी महिलाहरुको आर्थिक पक्षसँग जोडिएको यो कार्यक्रमले उनीहरुलाई थोरै भए पनि आत्मनिर्भर बनाउने सामाजिक विकास कार्यालय काभ्रेकी प्रमुख रनमाया फ्याकले जानकारी दिनुभयो । यो कार्यक्रम संचालन गर्न इच्छुक पालिकाहरुले प्रदेश सरकारसँग लागत साझेदारी गर्नुपर्छ । जसमा न्यूनतम १५ प्रतिशतदेखि बढीमा जति पनि गर्न सकिनेछ । जसमा बेथानचोकले भने ५० प्रतिशत लगानी गरेको छ । यहाँ वागमती प्रदेश सरकार र पालिकाको गरि गत आर्थिक वर्षमा ३६ लाख ४२ हजार ५७० रुपैंयाँको लगानी साझेदारी रहेको छ ।