जातिय भेदभावको विरोधमा सचेतना जनागाल

मेच्छे गाविस–८ घर भई उग्रतारा जनागाल गाविस–८ जनागालस्थित कुवेर रोकायाको घरमा चिया पसल गरी बस्ने कान्छा तामाङका परिवारले ०६९ असोज १४ गते साँझ घरधनीकै आफन्त २४ वर्षीया मैया रोकायालाई दलित भनी दुव्र्यवहार गरेका कारण ०६९ असोज १६ गते विहान चियापसलकै प्राङ्गणमा सरोकारवालाहरु जम्मा भएर पीडकद्वारा क्षमायाचना, चियापान तथा सचेतना कार्यक्रम सम्पन्न भयो ।
आफन्तको घरमा रहेको चियापसलमा चिया खाएर बसेकी मैयालाई पसलका धनी कान्छा, निजकी पत्नी ठूली र छोरा सिंहे तामाङले दलितहरु आएका कारण आफ्नो पसलमा अन्य जातका मानिसहरु नआएकाले बाहिर बसेर चिया खान भनेका कारण दुबै पक्षवीच बादविवाद भएको थियो । अहिलेको समयमा पनि जातिय विभेद भएको भनी पीडित रोकायाले ०६९ असोज १५ गते इलाका प्रहरी कार्यालय बनेपामा उजुरी गरेकी थिइन् ।
प्रहरीले पीडकहरुलाई प्रहरी कार्यालयमा झिकाएपछि आफूहरुद्धारा अन्जानमा गल्ती गरेको स्वीकारेका कारण प्रहरीकै रोहबरमा घटनास्थलमा नै सचेतना तथा क्षमायाचना कार्यक्रम भएको हो ।
कार्यक्रममा पीडित मैया रोकाय, पीडक पक्षका तर्फबाट सिंहे तामाङ, नेपाल बार एशोसियसनका उपाध्यक्ष रमेश हुमागाई, इन्सेकका प्रतिनिधि भोजराज तिमल्सिना, नेपाल पत्रकार महासंघ काभ्रेका अध्यक्ष महेश पौडेल, दलित मुक्ति मोर्चाका अध्यक्ष लेखराज गजमेर, नेपाल दलित संघ काभ्रेका अध्यक्ष रामचन्द्र रम्तेल, राष्ट्रिय दलित समाज कल्याण संघ काभ्रेका उपाध्यक्ष प्रकाश रोक्का, दलित महिला संघ काभ्रेकी उपाध्यक्ष निर्मला परियार, रिनाअर्पण दलित संस्थाकी अध्यक्ष गिता रसाइली, नवमिलन यूवा क्लवका अध्यक्ष श्यामकुमार मिजार र स्थानीय समाजसेवी सानुभाई विष्ट लगायतका व्यक्तिहरुले जातिय छुवाछुत समाजको कलङ्क भएको बताए ।
कार्यक्रममा इलाका प्रहरी कार्यालय बनेपाका प्रहरी निरिक्षक खेमराज आचार्य र जिल्ला ट्राफिक कार्यालय बनेपाका प्रहरी निरिक्षक धनबहादुर श्रेष्ठ लगायत स्थानीयहरुको उल्लेख्य सहभागिता रहेको थियो ।