फोनिज स्थापना दिवसमा रक्तदान

नुवाकोट । नेपाल आदिवासी जनजाती पत्रकार महासंघ (फोनिज) को २३औं स्थापना दिवसको अवसर पारेर आयोजित रक्तदान कार्यक्रममा १५ जना रक्तदाताहरुले रक्तदान गर्नुभएको छ ।

फोनिज नुवाकोटद्वारा आयोजित उक्त कार्यक्रममा सञ्चारकर्मीहरुको मर्म र आचारसंहिता लगायतका विषयमा चर्चा गर्दै फोनिजले समाजमा छोडेको सकारात्मक प्रभावका कारण आज राष्ट्रिय, अन्तर्राष्ट्रिय स्तरमा आफ्नो छविलाई सबल बनाउन सक्षम भएको धारणा फोनिज जिल्ला अध्यक्ष शक्तिमाया तामाङले व्यक्त गर्नुभएको छ । केन्द्रको परिपत्र अनुसार देशभर रहेका फोनिजको शाखाले स्थापना दिवस मनाउने कार्यक्रमअनुसार मङ्गलबार रक्तदान गरिएको फोनिज नुवाकोटका अध्यक्ष तामाङले बताउनुभएको छ ।

नेपाल आदिवासी जनजाति महासंघ नुवाकोटका अध्यक्ष भगवान रानामगरको प्रमुख आतिथ्यतामा भएको रक्तदानमा नेपाल पत्रकार महासंघ बागमती प्रदेश समितिका अध्यक्ष शिव देवकोटा, नेपाल पत्रकार महासंघ नुवाकोटका अध्यक्ष कपिलदेव खनाल लगायतको उपस्थिति रहेको थियो ।

यस्तै, फोजिन नुवाकोटले स्थापना दिवसमा सोमबार नुवाकोटको विदुर नगरपालिका वडा नम्बर २ बट्टार लामीडाँडामा रहेको साङ्गे छ्योइलिङ दोर्जोङ गुम्बामा सरसफाई समेत गरेको छ । रक्तदानमा नेपाल रेडक्रस सोसाइटी नुवाकोट शाखाको रक्त सञ्चार सेवाको प्राविधिक सहयोग र ब्लड अन रिक्वेस्ट इन नुवाकोटले समन्वय गरेको थियो ।