यि ४ मध्ये कसले बाजी मार्ला ?

निर्वाचन परिणाम एकपछि अर्काे गर्दै सार्वजनिक भइरहँदा काभ्रे जिल्लामा रहेका २ वटा प्रतिनिधि सभा निर्वाचनको परिणाम कसको पोल्टामा जान्छ भन्ने निक्र्याैल गर्न अझै केही समय पर्खनुपर्ने भएको छ ।
प्रतिनिधि सभा क्षेत्र नं. १ मा मुख्य प्रतिस्पर्धीका रुपमा रहेका सत्ता गठबन्धनका तर्फबाट साझा उम्मेदवार सूर्यमान दोङ (लालध्वज) र विपक्षी गठबन्धनका तर्फबाट एमाले उम्मेदवार रेशम लामा बिच कडा प्रतिस्पर्धा हुने हिजो साँझसम्मको जारी मत परिणामले देखाएको छ भने प्रतिनिधि सभा क्षेत्र नं. २ का प्रतिस्पर्धी गठबन्धनका साझा उम्मेदवार शिवप्रसाद हुमागाईं र विपक्षी गठबन्धनका नेकपा एमाले तर्फका उम्मेदवार गोकुल बास्कोटाबीच पनि उस्तै किसिमको कडा प्रतिस्पर्धा रहने देखाएको छ तर मत परिणामलाई नजिकबाट नियालिरहेका सरोकारवालाहरुको भने निष्कर्ष फरक छ । काभ्रेको सवालमा सत्ता गठबन्धन नै हाबी हुने विश्लेषण गरिरहेका छन् । जसअनुसार हिजो साँझसम्मको परिणामलाई हेर्ने हो भने सत्ता गठबन्धनसँग आबद्ध दलहरूले क्रमशः परिणाम आफ्नो पोल्टामा राख्दै गएका छन् ।
जसअनुसार काभ्रे जिल्लाको प्रतिनिधि सभा १ अन्तर्गतको मत परिणाम अनुसार सूर्यमान दोङ (लालध्वज) अग्रस्थानमा हुनुहुन्छ भने प्रतिनिधि सभा क्षेत्र नं. २ मा पनि शिवप्रसाद हुमागाईंको जित सुनिश्चिततर्फ बढेको प्रारम्भिक परिणामले देखाएको छ । स्मरण रहोस्, यो निर्वाचन क्षेत्र राष्ट्रियस्तरमै सबै मतदाता नेतृत्व र उम्मेदवारहरूको ध्यान खिच्ने क्षेत्रको रुपमा लिइन्छ । चर्चित एमाले नेता गोकुल बास्कोटा र प्रष्ट राजनीतिक छवि बोकेका हुमागाईं बिचको यो भिडन्तलाई राजनीतिक क्षेत्रमा चासोको रुपमा घेरिएको छ ।
काभ्रेको यस क्षेत्रमा खसेको मतलाई हेर्ने हो भने पनि ति राजनीतिक विश्लेषणहरू सावित हुने देखिन्छ । जसका कारण काभ्रेलीहरूको प्रतिष्ठाको विषयको रुपमा रहेको यो परिणामलाई काभ्रेली जनले कसरी पेश गरेका छन् त्यो भने केही दिनको पर्खाई पछि पुष्टि हुनेछ । अहिलेसम्मको मत भार हेर्ने हो भने प्रतिनिधि सभा १ अन्तर्गत स्थानीय चुनावमा प्राप्त मत अनुसार करिब ६२ हजार मतले गठबन्धन अघि थियो भने क्षेत्र नं. २ मा पनि करिब १७ हजार मतले अघि रहेको थियो ।
यसरी हेर्दा गठबन्धन मजबुत देखिन्छ । तर ४ गते सम्पन्न निर्वाचनमा भने सो अनुसारको मतदान हुन सकेको छैन । त्यसले गर्दा परिणाम कसको पोल्टामा जान्छ भन्न सक्ने अवस्था नरहेको निर्वाचनमा परिवेक्षकको भूमिकामा रहेको नेपाल मानव अधिकार संगठनको ठम्याइ छ ।