सापकोटाको सालिक अनावरण हुँदा संस्था र सम्पत्ति नै ओझेलमा

सम्पादकलाई चिठी

श्री सम्पादकज्यू
तपाईंको पत्रिकाको वर्ष १८ अंक २२ को मंसिर २१ गते बुधबारका दिन प्रकाशित पत्रिकाको पहिलो पेजको चौथो समाचारमा पाँचखालमा सापकोटाको सालिक अनावरण भन्ने समाचार छापिएपछि उक्त समाचार तीन पटक सम्म पढियो । यसका लागि हाम्रो परिवारको तर्फबाट धन्यवाद गर्न चाहन्छौं । यो घटनालाई फेरि एक पटक ब्युँझाउने काम गर्नुभयो । यसले हामी भित्र घटेको सर्वाधिक दुखित घटना हो भने नेकपा एमाले काभ्रे जिल्ला परिवार भित्रका दुई ठूला महत्वपूर्ण घटनाहरु हुन् ।
क. बलराम सापकोटा अपहरण गरी लामो समयसम्म बेपत्ता पारिए पनि उनका हत्याराहरुले अपहरण गरी लगेकै रात हत्या गरेको जानकारी धेरै समयपछि मात्र गरेका थिए । त्यस अपहरण र हत्यामा संलग्न एक महिला नेकपा एमाले र माओवादीसँगको एकतापछि बनेको नेकपाको जिल्ला अध्यक्ष हुँदै माकेको सांसद बन्न पुग्नु भएको छ । अपहरणकै एक वर्ष भित्र प्रकाशित काभ्रे टाइम्स नामक पत्रिकाले विदुर सापकोटालाई माओवादीमा बुझाए । बलराम सापकोटा फिर्ता दिने समाचार प्रकाशित ग¥यो । पछि एमालेको स्थानीय कार्यकर्ताको ठूलो दबाबका कारण एमाले केन्द्रीय कमिटीको सक्रियतामा बलराम सापकोटाको अपहरणकै दिन हत्या भएको जानकारी गराएको थियो ।
स्व. बलराम सापकोटाको अवस्था सार्वजनिक हुनासाथ नेकपा एमाले पाँचखाल गाउँ कमिटीका पदाधिकारी शुभ अधिकारी, रविन्द्र सिपखान, उपेन्द्र बानियाँ, राजन, रुद्र बहादुर बानियाँ, गंगा सत्याल सापकोटा र तत्कालिन जिल्ला कमिटी सचिव विदुर सापकोटाको सक्रियतामा बलराम सापकोटा स्मृति प्रतिष्ठान नामक संस्थाको गठन भयो । उक्त संस्थाको लागि सहयोग रसिद छपाई २०५९ साल सम्ममा करिब ५ लाख रुपैयाँ स्मृति प्रतिष्ठानमा जम्मा भयो । तत्कालिन जिविस सभापति कृष्णप्रसाद सापकोटाको निर्देशनमा सबै जिविस सदस्यहरुले ठूलै रकम उक्त प्रतिष्ठानको कोषमा जम्मा गरेका थिए ।
आफ्नो राजनीतिक जीवन लगातार तीन पटक सांसदको टिकट पाई अन्तिम पटक मात्र विजय हासिल गरेका विदुर सापकोटाले सांसदको अवधिभर बलराम सापकोटा स्मृति खेल मैदान बनाए । उक्त खेल विदुर सापकोटा, प्रविन श्रेष्ठ र राजन सापकोटाको लागि ५ वर्ष सम्म अनियमितता गर्ने थलो बन्यो । प्रत्येक वर्ष ५–७ लाख गरी करिब ३५ लाख बजेट मध्ये करिब १० लाख मात्र खेल मैदानमा खर्च भयो । हामी सहिद परिवारकै अगाडि स्व. बलराम सापकोटाको नाममा ठगीखेलको भाँडो बन्यो । हाम्रो आँखा अगाडि नै प्रतिष्ठान (संस्था) र सम्पत्ति दुवै ओझेलमा परे । बलराम सापकोटाको हत्याको पक्षमा वकालत गर्ने माओवादीका खाओवादीहरुलाई एमालेमा ल्याई समानुपातिकमा सभासद् बनाई स्व. बलराम सापकोटा, सापकोटाकी धर्मपत्नी क. सरिता सापकोटालाई समानुपातिकमा सांसद बनाउनु सट्टा क. गोकुल बाँस्कोटाले तिनै हत्याराहरुलाई भोट माग्न सरिता सापकोटालाई लिएर हिँडेको देख्दा हामी सापकोटा परिवार फेरि एक पटक पिडित बन्न बाध्य छौं । स्मरण रहोस्, यो सालिक पार्टी र प्रतिष्ठान दुवैले बनाएको हैन त्यो त पाँचखाल नगरपालिकाले विकासको बजेट कटौती गरेर बनाएको सम्पत्ति हो । सालिकको अनावरण गर्नु आउनुभएको प्रमुख अतिथिले उक्त हराएको प्रतिष्ठान (संस्था) र सम्पत्तिको पनि खोजी र संरक्षण गरी बलराम सापकोटाको इमान्दारिता र आदर्शलाई संस्थागत विकास गर्ने बुद्धि पनि पलाओस् भन्ने कामना गर्दछौं ।
– विवेक शर्मा, पाँचखाल, हालः दुबई