जिल्ला प्रशासन कार्यालयको प्रयास सार्थक हुनेमा आशावादी छौं- प्र.जि.अ. पौडेल

काभ्रे । जिल्ला प्रशासन कार्यालय काभ्रेमा जिल्लाबासिले पाउने सेवामा देखिएको बेथितिको दीर्घकालीन समाधानका लागि टाइम काड र टोकन प्रणाली सार्थक हुने प्रमुख जिल्ला अधिकारी पुण्य बिक्रम पौडेलले पत्रकार सम्मेलनमा बताउनु भएको छ ।

प्रमुख जिल्ला अधिकारी पौडेलले राहदानीलगायतका सेवा प्रवाहमा देखिएका समस्या समाधानका लागि ५ वटा अभियान सुरु गरेको जानकारी गराउनु भएको छ । प्रमुख जिल्ला अधिकारी पौडेलले केही दिन असुविधा जस्तो देखिए पनि दीर्घकालीन रुपमा राहदानी वितरणमा सहज हुने गरी कार्य प्रारम्भ गरिएको बताउनु भएको छ । बिहिबारदेखि राहदानी प्राप्त गर्न आउने सेवाग्राहीहरूका लागि टोकन प्रणाली सुरु गरिएको बताउँदै पौडेलले टाइम कार्ड र टोकन एकै पटक वितरण गरे पछि राहदानीका लागि फाराम भरिदिने कार्य पनि कार्यालय आफैले गरिदिने जानकारी दिनु भएको छ । यसले नागरिकहरूले अन्यत्र फाराम भर्दा लाग्ने अतिरिक्त शुल्क तथा प्रक्रियामा पनि सहज र सरलीकरण हुने उहाको भनाइ छ । हाल राहदानीको फाराम भर्दा फाराम भरे बापत सेवाग्राहीले २ सय देखि ५ सय रुपैयाँसम्म राहदानी भर्नेलाई बुझाउँदै आएकोमा अब भने त्यो अनावश्यक खर्च ब्यहोर्नु नपर्ने भएको छ । जिल्ला प्रशासन कार्यालयमा फोटो खिच्ने, राजश्व बुझाउने र अन्य प्रक्रिया झन्झटिलो हुने गरेकोमा अब प्रक्रियालाई सहज र सरल बनाउन जिल्ला प्रशासन कार्यालय काभ्रेले पहिलो पटक टाइम र टोकन एकै पटक वितरण गरेको हो । सेवामा सरलीकृत गर्ने उद्देश्यले राहदानीबाट सुरु भएको यो प्रक्रिया नागरिकता र राष्ट्रिय परिचयपत्रमा समेत लागु गरिने जनाइएको छ । राहदानीका लागि सेवाग्राहीले नागरिकता, विवाह गरेको अवस्थामा विवाह दर्ता, राष्ट्रिय परिचय पत्र खिचेको कागज तथा पुरानो राहदानी भए त्यसको सक्कलै र हराएको अवस्थामा त्यसको फोटोकपी सहितका कागजात पेश गर्नु पर्नेछ । प्रशासन कार्यालयका अनुसार टोकन र टाइम लिएको व्यक्ति घण्टौँ लाइनमा बस्नु पर्ने छैन । पहिलो दिन समय नपाएको अवस्थामा प्राप्त गरेको दिन र समयमा आएर आफ्नो कार्य गर्न सक्नेछ । पहिलो चरणमा जिल्ला प्रशासन कार्यालयले बिदाको दिनमा समेत कार्य गर्ने गरी योजना बनाएको प्रमुख जिल्ला अधिकारी पौडेलले बताउनु भएको छ । राष्ट्रिय वाणिज्य बैकको काउन्टर पनि बिदाको अवधिमा समेत खोल्ने गरी प्रशासन कार्यालयले व्यवस्था गरेको छ ।

अब बिदाको दिनमा पनि जिल्ला प्रशासन कार्यालय काभ्रे ले सेवाग्राहीलाई सेवा प्रदान गर्ने भएको हुँदा जिल्लबासिले सम्यमित भएर सेवा लिन आग्रह समेत पत्रकार सम्मेलनमा जानकारी गराइएको छ ।