अनुकरणीय कार्य गरेबापत सञ्चारकर्मी तामाङ सम्मानित

हेटौंडा । पत्रकारितामा लामो समयदेखि क्रियाशील शक्तिमाया तामाङलाई बागमती प्रदेश सरकारले नगद सहित सम्मान गरेको छ ।
गणतन्त्र दिवस २०८० को अवसरमा आयोजित कार्यक्रममा बागमती प्रदेश सरकारले विभिन्न विधाका उत्कृष्ट व्यक्तित्वहरुलाई सम्मान गर्ने क्रममा सञ्चारकर्मी तामाङलाई नगदसहित सम्मान गरेको छ । उक्त अवसरमा पत्रकारिता क्षेत्रमा कलम चलाएबापत ६ जना पत्रकारहरुलाई पुरस्कृत गरेको छ । प्रदेश सरकारले बागमती प्रदेशमा पत्रकारिता मार्फत् क्रियाशील रही समाज रुपान्तरणमा अनुकरणीय भूमिकाको योगदान र मूल्यांकन गरेको भन्दै नुवाकोटका पत्रकार शक्तिमाया तामाङलाई नगद २० हजार सहित प्रमाणपत्र, दोसल्लाबाट पुरस्कृत गरेको छ ।
प्रदेश प्रमुख यादवचन्द्र शर्मा र मुख्य मन्त्री सालिकराम जमकट्टेलले पत्रकार तामाङलाई संयुक्त रुपमा सम्मान गरेका हुन् । लामो समयदेखि बिबिसी नेपाली सेवा र नुवाकोटको रेडियो चिम्टेश्वरमा आबद्ध तामाङ नेपाल जनजाति आदिबासी पत्रकार महासंघ नुवाकोटका अध्यक्ष पनि हुन् भने नेपाल पत्रकार महासंघ नुवाकोटका प्रतिनिधि पनि हुन् । उक्त अवसरमा पत्रकार सुरेश कसजू, अनिल ढकाल, शिवकुमार रिजाल, विक्रम रत्न लगायतका पत्रकारहरु पुरस्कृत भएका छन् ।