६१औं रेडक्रस जन्मोत्सवमा विविध कार्यक्रम

काभ्रे । आजनेपाल रेडक्रस सोसाइटी काभ्रेपलाञ्चोक जिल्ला शाखाले रेडक्रसको ६१औं जन्म दिवस आज एक समारोहबीच सम्पन्न गरेको छ ।
उक्त कार्यक्रममा नेपाल रेडक्रस सोसाइटीका उपसभापति देवेन्द्र भैल, कार्यसमितिका पदाधिकारी र पूर्वमन्त्री उद्धवप्रसाद पौडेल, जिल्ला सदस्य देवीप्रसाद नेपाल, पुण्यवती घले लगायतले केक काटेर जन्मोत्सव मनाएका छन् ।
त्यसैगरी नेपाल रेडक्रस सोसाइटी महादेवस्थान उपशाखाको व्यवस्थापनमा नगरकोटमा निःशुल्क स्वास्थ्य शिविर सम्पन्न गरेको छ । नाल्दुम नगरकोट जेसिसको संयोजनमा भएको उक्त स्वास्थ्य शिविरमा १ सय ७ जना बिरामीहरुले स्वास्थ्य लाभ गरेको नेपाल रेडक्रस सोसाइटीका पूर्वमन्त्री उद्धवप्रसाद पौडेलले जानकारी गराउनुभएको छ । जनैपूर्णिमाको अवसर पारेर आयोजना गरिएको निःशुल्क स्वास्थ्य शिविरमा महादेव पोखरीमा स्नान गर्न आउने श्रद्धालुहरुले सेवा लिएको मन्त्री पौडेलले बताउनुभएको छ ।
त्यसैगरी नेरेसो पनौती उपशाखाले आफ्नो भवन वरिपरि सरसफाइ गरेर जन्मोत्सव मनाएको नेरेसो पनौती उपशाखाका सभापति राजु ताम्राकारले बताउनुभएको छ । साथै रेडक्रसका जन्मदाता हेनरी ड्युनाको तस्वीरमा माल्यार्पण गरेर कार्यक्रमको शुभारम्भ गरिएको उपशाखा सचिव मनोज श्रेष्ठले जानकारी गराउनुभएको छ ।