विभिन्न पार्टी परित्याग गर्दै माओवादी केन्द्रमा दर्जनौँको प्रवेश

काभ्रे । जिल्लाको तेमाल गाउँपालिकामा नेकपा माओवादी केन्द्रमा विभिन्न पार्टी परित्याग गरी दर्जनौँ नेता तथा कर्याकर्ता प्रवेश गरेका छन् । आज काभ्रेको तेमाल–९ मा भएको कार्यक्रममा नवप्रवेशीहरुलाई माओवादी केन्द्र जिल्ला समन्वय समिति काभ्रेका संयोजक भोला अर्यालले नवप्रवेशीहरुलाई स्वागत गरेर प्रवेश गराएका छन् ।
प्रवेश हुनेमा नेकपा एमालेका हिरालाल योन्जन, हस्तबहादुर ब्लोन र कान्छामान दोङ, नेपाली कांग्रेसका धन बहादुर योन्जन र नीर बहादुर तामाङ, जनता समाजवादी पार्टी (जसपा) फुलमाया तामाङ, राष्ट्रिय प्रजातन्त्र पार्टी (राप्रपा) का दुर्गा दोङसहित स्वतन्त्र पार्टीका कान्छा स्याङ्तान, च्याङ्बा लामा, कान्छी तामाङ लगायत दजनौँ माओवादी केन्द्रमा प्रवेश गरेका हुन् ।
काभ्रेका संयोजक अर्यालले ‘जनतासँग माओवादीः विशेष रुपान्तरण अभियान, जनजनमा माओवादी–घरघरमा माओवादी’ ३ महिने अभियान अन्र्तगत उहाँहरुलाई पार्टीमा प्रवेश गराएका हुन् ।
तेमालमा माओवादी केन्द्रका केन्द्रिय सदस्य शंकर दुलालको नेतृत्वमा अभियान सञ्चालन भएसँगै अभियानकै बिच पार्टी प्रवेश कार्यक्रममा काभ्रेका संयोजक अर्यालसँगै जनयुद्धका पहलकर्ता चलाखसिं तामाङ, प्रेस सेन्टर नेपालका केन्द्रिय सचिव डिलबहादुर थोकर लगायत स्थानीय नेताहरुको उपस्थितिमा सो कार्यक्रम भएको हो ।
कार्यक्रममा काभ्रेको संयोजक अर्यालले अहिलेको परिवर्तनको जग जनयुद्ध र जनआन्दोलन नै भएको र माओवादीको एजेण्डामा देश अगाडी बढीरहेकोले माओवादी केन्द्रलाई बलियो बनाउनुपर्ने उहाँको भनाई रहेको छ ।
नवप्रवेशी हिरालाल योञ्जनले देश र जनताको मुक्तिको लागि लड्ने पार्टी माओवादी केन्द्र मात्रै भएकोले आफु लगायत दर्जनौँ साथीहरु प्रवेश गरेको बताएका छन् । नवप्रवेशीहरुले अन्य पार्टीबाट देशको परिवर्तन सम्भव नदेखिएकोले माओवादी केन्द्रमा एकताबद्ध हुनुको विकल्प नरहेको समेत उक्त अवसरमा खुलासा गरेका छन् ।