राष्ट्रपति रनिङ शिल्ड प्रतियोगिता शुरु

काभ्रे । काभ्रे जिल्लाको रोशी गाउँपालिकामा राष्ट्रपति रनिङ शिल्ड प्रतियोगिता बिहिवारबाट शुरु भएको छ ।

रोशी गाउँपालिकाका अध्यक्ष दिनेश लामाले उद्घाटन गर्दै खेलले आफ्नो व्यक्तित्व बिकास गर्नुका साथै समाज र राष्ट्रलाई योगदान गर्ने अवसर मिल्ने बताएका छन् । खेलको माध्यामबाट जिल्ला, प्रदेश, राष्ट्र र अन्तराष्ट्रमै रोशीको नाम चिनाउन सफल हुनको लागि अध्यक्ष लामाले शुभकामना दिनुभएको छ ।

सम्बोधनकै क्रममा गाउँपालिका उपाध्यक्ष मिमबहादुर वाईबाले खेलमा सिकेको व्यवहारहरूलाई जीवनमा उतारेर सफल व्यक्तित्व निर्माण गर्न उपाध्यक्ष वाईबाले खेलाडीहरूलाई अनुरोध गरेका छन् ।
त्यस्तै रोशी गाउँपालिकाका प्रमुख प्रशासकीय अधिकृत रामबहादुर तामाङले स्वागत मन्तव्य राख्दै राष्ट्रपति रनिङ शिल्ड गाउँपालिकाको बिरासत बोकेको कार्यक्रमको रुपमा राखेको बताएका छन् ।

रनिङ शिल्डमा जिल्ला, प्रदेश र राष्ट्रमै रोशी गाउँपालिकाको नाम स्वर्ण अक्षरले लेख्ने गरी खेल प्रस्तुत गर्न तामाङले आग्रह गर्दै रोशी गाउँपालिका भित्रको ७२ वटा विद्यालय, ६ हजार भन्दा बढी विद्यार्थी र ४ सय ५० भन्दा बढी शिक्षकहरूलाई समेट्ने तामाङले बताएका छन् ।
जिल्ला खेलकुद बिकास समिति काभ्रेका अध्यक्ष मानबीर लामा, रोशी गाउँपालिका वडा नं. ११ का वडाध्यक्ष अशोक गौतम लगायतले मन्तव्य राखेका छन् ।
रोशी गाउँपालिका वडा नं. ७ मा अवस्थित रोशी माध्यमिक विद्यालयमा शुरु भएको राष्ट्रपति रनिङ शिल्ड ४ दिनसम्म सञ्चालन हुनेछ ।

प्रतियोगितामा १६ वटा विद्यालय सहभागी रहेकोमा भलिवलमा छात्र ८ समुह र छात्रा ६ समुह, कवड्डीमा छात्रको ९ समुह र छात्राको ९ समुह, हाईजममा छात्रको ११ समुह र छात्राको ११ समुह, लङजममा छात्रको १३ समुह, छात्राको ११ समुह, सर्ट फूटमा छात्रको १३ समुह र छात्राको ११ समुह, त्रिपल जम्पमा छात्रको ८ समुह, छात्राको ८ समुह, ज्यावलङ थ्रोमा छात्रको ९ र छात्राको ८ समुह, दौडमा छात्रको १४ समुह र छात्राको १४ समुह र रिले दौडमा छात्रको १२ समुह र छात्राको ११ समुहले भाग लिएको छ ।
कार्यक्रममा नेपाल योग खेलकुद संघका केन्द्रिय सदस्य भेषराज शाह, जुडो संघका अध्यक्ष भिमसेन केसी, विभिन्न विद्यालयका शिक्षक अविभावक, विद्यार्थी लगायतको उपस्थिती रहेको थियो ।