सवारी दुर्घटनामा २ जना घाइते, एकको मृत्युु

काभ्रे । धुलिखेल नगरपालिका वडा नं. ८ स्थित जिपलाईन नजिकै अरनिको राजमार्गमा आज मोटरसाइकल दुर्घटना भएको छ ।
धुलिखेलबाट खावा तर्फ आउँदै गरेको लु ६५ प ३९७५ नं. को मोटरसाइकललाई सोही दिशा आउँदै गरेको ना ३ ख ७६७९ नं. को टेलर गाडिले पछाडिबाट ठक्कर दिँदा मोटरसाइकलमा सवार २ जना मानिस घाईते भएको जिल्ला प्रहरी कार्यालय काभ्रेले जानकारी दिएको छ ।
घाइते हुनेमा मोटरसाइकल चालक काठमाण्डौ बौद्ध बस्ने बर्ष ५२ को ब्यास कार्कीको हात खुट्टामा सामान्य चोट लागेको र निजका छोरी वर्ष २३ की सिर्जना कार्कीको दाहिने खुटा र हातमा चोट लागि गम्भिर अवस्था रहेको प्रहरीले जानकारी दिएको छ। उनीहरूको धुलिखेल अस्पतालमा उपचार भईरहेको प्र.स.नि. रबिन्द्र बस्नेतले जानकारी दिँदै सवारी साधन र टेलर चालक प्रहरीको नियन्त्रणमा रहेको प्र.स.नि. बस्नेत जानकारी दिनुभएको छ ।
त्यसैगरी पाँचखाल नगरपालिका वडा नं. ६ हनुमानगढी स्थित अरनिको राजमार्ग सडक खण्डमा खाँवा तर्फबाट पाँचखालतर्फ आउँदै गरेको बा ८७ प ६४१  नं. को मोटरसाइकलले नम्बर नखुलेको बसलाई ओभरटेक गर्ने क्रममा अनियन्त्रित भई बिपरित दिशाबाट जाँदै गरेको  प्र. ३- ०१- ००५ ख ९७०३ नं. को डिब्बा गाडिमा ठक्कर  खाँदा मोटरसाइकलको दुर्घटना भएको प्रहरीले जनाएको छ ।
दुर्घटनामा मोटरसाइकल चालक काभ्रे जिल्ला पनौती नगरपालिका वडा नं. १२ बस्ने  अन्दाजी बर्ष ३४ का रुपक खत्रीको घटनास्थलमा नै मृत्यु भएको प्रहरीले जानकारी दिएको छ ।