हाजिरीजवाफ तथा चित्रकला प्रतियोगितामा पार्वती माविको वर्चश्व

च्याल्टी । बेथानचोक गाउँपालिकाद्वारा आयोजित अन्तर आधारभूत तहस्तरीय हाजिरीजवाफ तथा चित्रकला प्रतियोगितामा पार्वती माविले वर्चश्व खडा गरेको छ ।
बेथानचोक गाउँपालिका वडा नं. ५ मा रहेको आत्मा विकास माध्यमिक विद्यालयको संयोजनमा भएको कक्षा ६ देखि ८ सम्मको हाजिरीजवाफमा पार्वती मा.वि. प्रथम कृष्ण गोपाल मा.वि. द्वितीय एवम् भूमिमाता मा.वि. तृतीय र चक्रेश्वर मा.वि.ले सान्त्वना स्थान प्राप्त गरेको छ । यस्तै चित्रकलामा कक्षा १ देखि ५ सम्मकोतर्फ पार्वती मा.वि नै प्रथम भएको छ भने भीमसेनेश्वर मा.वि. द्वितीय, सरस्वती मा.वि. भुग्देउ तृतीय भएको छ भने गोरखनाथ प्रा.वि.ले सान्त्वना स्थान हासिल गरेको छ ।
प्रतियोगितामा बेथानचोक गाउँपालिकाका अध्यक्ष भगवान अधिकारीले विजयी भएकाहरुलाई प्रमाणपत्र र पुरस्कार वितरण गर्दै पालिकास्तरमा हुने यस प्रकारका प्रतिस्पर्धात्मक प्रतियोगिताले बेथानचोकका विद्यार्थीहरुलाई देशैभरका ७ सय ५३ वटै पालिकामा रहेको विद्यार्थीसँग प्रतिस्पर्धा गर्न सक्षम हुने बताउनुभएको छ । उहाँले अभिभावकहरुसँग कार्यक्रमहरु सुझावका रुपमा माग्दै रचनात्मक कार्यक्रमहरु शैक्षिक क्यालेण्डर बनाएर अघि बढ्ने बताउनुभएको छ । अध्यक्ष अधिकारीले विद्यार्थीलाई सैद्धान्तिक ज्ञान मात्र नभई व्यवहारिक शिक्षा पनि प्रदान गर्नुपर्ने बताउनुभएको छ ।
कार्यक्रममा वडा नं. ५ का अध्यक्ष राजकुमार वाइबाले मानव जीवनमा शिक्षाको महत्व धेरै भएकाले वैज्ञानिक शिक्षा प्रदान गर्नु आजको आवश्यकता रहेको भन्दै पालिकास्तरीय प्रतिस्पर्धाले प्रतिभा उत्पादन हुने बताउँदै गाउँपालिकाले विभिन्न गतिविधि छुट्टा छुट्टै वडाहरुमा गर्दै जाने नीति लिएकोमा यी २ प्रतियोगिता आफ्नो वडामा सञ्चालन गरेको वडा अध्यक्ष वाइबाले जानकारी दिनुभएको छ ।
आत्माविकास माध्यमिक विद्यालयका व्यवस्थापन समिति अध्यक्ष जगत तामाङले धन्यवाद दिएको कार्यक्रममा गाउँपालिका उपाध्यक्ष तारा राना तिमल्सिना, वडा नं. २ का अध्यक्ष पुरुषोत्तम तिमल्सिना, ६ नं. वडाका अध्यक्ष विष्णु तामाङ, बेथानचोक गाउँपालिका शिक्षा शाखा प्रमुख पुष्पा राइ लगायतको उपस्थिति रहेको थियो ।