दक्ष जनशक्ति विदेशिनु राज्यको लागि चिन्ताको विषय भएको छः मन्त्री लामा

काभ्रे । शिक्षाको क्षेत्रमा अतुलनीय योगदान रहेको काभ्रे बहुमुखी क्याम्पसको पाँचौं क्याम्पस सभालाई सम्बोधन गर्दै बाग्मती प्रदेशका आर्थिक मामिला तथा योजना मन्त्री बहादुर सिं लामाले उच्च शिक्षाको लागि युवा विदेशिनुपर्ने बाध्यता चिन्ताको बिषय भएको बताउनुभएको छ ।
काभ्रे बहुमुखी क्याम्पसको ५ औं क्याम्पस सभालाई सम्बोधन गर्दै उहाँले पढाइकै लागि टाढा–टाढा धाउनुपर्ने अवस्थाको अन्त्य हुनुपर्ने तर्क राख्दै पढ्न कै लागि विदेश जानुपर्ने, अन्य शहर जानुपर्ने चिन्ताको बिषय भएको मन्त्री लामाले बताउनुभएको थियो । विभिन्न संकायका विषय अध्यापन गर्न चाहने क्याम्पसलाई विश्वविद्यालयले स्विकृती दिनुपर्छ, अल्झाएर राख्नुहुँदैन बताउनुभएको थियो ।
कार्यक्रममा बाग्मती प्रदेश सभा सदस्य कञ्चनचन्द्र बादेले पूर्वाधार विकास हाम्रो प्राथमिकतामा पर्दै आएको भन्दै शिक्षा क्षेत्रको विकास नभइ अन्य क्षेत्रको विकास नहुने बताउनुभएको थियो । त्यस्तै बनेपा नगरप्रमुख शान्तिरत्न शाक्यले शिक्षा वा रोजगारीको लागि बढ्दो युवा पलायन रोक्नुपर्ने बताउनुभएको थियो ।
कार्यक्रममा बनेपा वडा नं ६ का वडाअध्यक्ष सचितानन्द केसी, पूर्व सभासद् शिला कतिला, काभ्रे बहुमुखी क्याम्पसका पूर्व प्रमुख कमला कायस्थ, चैतन्य बहमुखी क्याम्पसका प्रमुख जुजुभाइ मानन्धर, क्याम्पस सञ्चालक समितिका अध्यक्ष लम्बोदर कायस्थ, उपाध्यक्ष मोहन दुवाल, सदस्य राजाराम धौभडेल, उपप्राध्यापक कृष्णप्यारी नकर्मी लगायतले जिल्लाको पुरानो काभ्रे बहुमुखी क्याम्पसलाई सबै क्षेत्रको साथ सहयोग आवश्यक रहेको बताएका छन् ।
क्याम्पस प्रमुख केजी बैदारले विभिन्न संकायका ८ कार्यक्रम सञ्चालन गरिरहेको भन्दै विभिन्न कार्यक्रमका कक्षा सञ्चालनको लागि विश्वविद्यालयले अनुमति नदिएको गुनासो राख्नुभएको थियो । पढ्न नपाएर र पढ्न नसकेर विदेशिनेको संख्या बढेको भन्दै उनले पब्लिक क्याम्पसहरुलाई सहयोग गर्ने हो भने त्यो क्रम रोकिने बताएका थिए ।
सभाले बार्षिक प्रतिवेदन, लेखापरिक्षण प्रतिवेदन, बार्षिक कार्यक्रम तथा अनुमानित आय÷व्यय विवरण समेत पारित गरेको थियो ।