काभ्रे बहुमुखी क्याम्पसमा प्रतियोगितात्मक कविगोष्ठी

भाद्र ७, २०८१ । काभ्रे बहुमुखी क्याम्पस अन्तर्गतको प्रकाशन समिति तथा नेपाल आमसञ्चार एवं ग्रामिण विकास विषय समितिको आयोजनामा भएको प्रतियोगितात्मक कविगोष्ठीको समुद्घाटन काभ्रे बहुुमुखी क्याम्पस सञ्चालक समितिका उपाध्यक्ष तथा साहित्यकार मोहन दुवालले पानसमा दीप प्रज्वलन गरी शुभारम्भ गरे ।
प्राध्यापक सुरेश बखुन्छेँद्वारा सञ्चालन भएको उक्त कविगोष्ठीको सभापतित्व युवराज न्यौपानेले गरेका थिए । ११ जना प्रतियोगिहरुमा १) समीक्षा गौतम २) सारिका कार्की ३) सुजिता दाहाल ४) मनिसा पिटिङ ५) प्रमिला चण्डी श्रेष्ठ ६) दिवेंका विश्वकर्मा ७) उषा घिमिरे ८) रोशनी अधिकारी ९) पार्वती ब्लोन १०) सङ्गिता श्रेष्ठ र ११) सञ्चिता सुवेदी थिए । क्याम्पस प्रमुख के.जि. बयदारले पनि कविता वाचन गरेको उक्त गोष्ठीमा प्राध्यापक तथा कवि खेमराज निरौलाले साहित्यको परिचय, सिद्धान्त, साहित्यलेखन गर्ने सम्बन्धमा आफ्नो विचार प्रस्तुत गरेका थिए ।
कार्यक्रमका प्रमुख अतिथि मोहन दुवालले आफ्नो विचार राख्दै भने – “विद्यालयमा कक्षा ८ पढ्दाताका नै कविता लेख्थें । कक्षा १० पढ्दाताका नै २०२३ सालमा ‘चुलिजाःगु स्वाँ’ नेपालभाषा कवितासङ्ग्रह प्रकाशित भएको मलाई सम्झना छ । यसैगरी २०२७ सालमा नै साहित्यिक पत्रिका ‘बिगुल’ को प्रकाशन गरियो । निरन्तर जीवनमा साहित्य बोकेर देखा परिरहें र हाल राष्ट्रमा नै व्याप्त हुन पाउँदा आफूलाई गौरव लाग्छ ।
कसैलाई पनि साहित्य पढेर, लेखेर र संप्रेषण गरेर घाटा लाग्दैन । साहित्यसँग मित्रता गाँस्नु र आत्मियता जोड्नुले कसैलाई पनि घाटा गर्दैन । जसले पनि साहित्य सिर्जना गर्न सोच्दा आफ्नो विचार प्रष्ट राख्न जान्नुपर्छ । विचार जनता र देशको पक्षमा हुनुपर्छ । त्यसैले मैले अनुरोध गरें – तपाईं सवल हुने हो भने साहित्यमा प्रवेश गर्नुहोस् ।”