देवेन्द्र भैलको नेतृत्वमा जिल्ला रेडक्रस

काभ्रे । आइतबार सम्पन्न नेपाल रेडक्रस सोसाइटी काभ्रे शाखा निर्वाचनबाट देवेन्द्रप्रसाद भैल सभापतिमा निर्वाचित हुनुभएको छ ।
जिल्ला शाखा कार्यसमितिको लागि भएको निर्वाचनमा भैलको टिम नै निर्वाचित भएको हो । उहाँको निकटतम प्रतिद्वन्दी आफ्नै पार्टीका नेता विदुरप्रसाद घिमिरेलाई ३८ मतले हराउँदै भैल सभापतिमा निर्वाचित भएका हुन् । भैलले १ सय ३ मत प्राप्त गर्दा घिमिरेले भने ६५ मतमा चित्त बुझाउनु परेको छ ।
त्यस्तै महिला उपसभातिमा पुष्पा खड्का बस्नेतले ९५ मत र खुल्ला उपसभापतिमा ज्ञान बहादुर तामाङले १०३ मत प्राप्त गरी विजयी हुनुभएको छ । समितिको मन्त्री (सचिव) मा राजु सिग्देलले १०१ मत प्राप्त गरी विजयी हुनुभएको छ । कोषाध्यक्षमा प्रेम कुमार तामाङ निर्विरोध निर्वाचित हुनुभएको छ भने उपमन्त्री (सहसचिव) मा प्रदिप केसीले १०६ मत र उपकोषाध्यक्षमा विनोद कोइराला १०५ मत प्राप्त गरी विजयी हुनुभएका हुन् ।
महिला सदस्यहरुमा सजिना श्रेष्ठ, भवानी केसी र शान्ति खत्री निर्विरोध हुनुभएका छन् भने खुल्ला सदस्यहरुमा रामकुमार श्रेष्ठ, उपदेश भुजेल, माधव प्रसाद नेपाल, विल बहादुर श्रेष्ठ, दामोदर श्रेष्ठ, कृपेन्द्र श्रेष्ठ र जगन्नाथ गिरी विजयी हुनुभएको हो ।
रेडक्रसको नयाँ समितिको लागि भैल र घिमिरे नेतृत्वको दूई समूहले प्रतिस्पर्धा गरेको निर्वाचनमा १८२ सदस्य रहेकोमा १७६ मत खसेको थियो । मतपरिणाम घोषणापछि निर्वाचित सबै सदस्यहरूलाई सपथ ग्रहण गराइएको कार्यक्रममा शाखाका नवनिर्वाचित सभापति देवेन्द्र भैलले प्रतिवद्धता मन्तव्य राख्नुभएको थियो । कार्यक्रममा निवर्तमान सभापति रघुनाथ हुमागाईं, पुर्वमन्त्री उद्धव पौडेल लगायतले कार्यकाल सफलताको शुभकामना मन्तव्य राख्नुभएको थियो ।
स्मरण रहोस्, नेपाल रेडक्रस सोसाइटी काभ्रे जिल्ला शाखाको इतिहासलाई केलाउने हो भने राजनीतिक रुपमा नेपाली कांग्रेस निकट अभियान्ताहरुको वर्चश्व कायम भएको पाइन्छ । जसको उदाहरण निकटतम प्रतिद्वन्द्वी विदुर प्रसाद घिमिरे यसअघि पनि प्रतिस्पर्धामा होमिएका थिए । त्यो अवस्था र अहिलेको अवस्थामा मतदाताहरु केलाउने हो भने रघुनाथ हुमागाईंले रेडक्रसको इतिहास केलाउँदा नेपाली कांग्रेसमा आफूलाई सुनौला अक्षरले कोरेको स्पष्ट आभाष दिलाएका छन् । यसबाट सामाजिक क्षेत्रमा नेपाली कांग्रेसको उपस्थितिलाई कमजोर रुपमा आँकलन गर्नु मुर्खता हुने सरोकारवालाहरुले व्यक्त गरेका छन् ।