आधुनिक प्रविधिको उच्चतम सुविधा दिन्छौं : सिइओ डा. हेक्टर

काभ्रेपलाञ्चोक/ बनेपामा रहेको काभ्रेपलाञ्चोक जिल्लाको पुरानो शिर मेमोरियल एड्भेन्टिस्ट अस्पतालले स्वास्थ्य क्षेत्रमा समय सापेक्षित पूर्वाधार र प्रविधिलाई एकसाथ अगाडी बढाउने क्रममा गत बुधबार आयोजित समारोहलाई सम्बोधन गर्दै अस्पतालका प्रमुख कार्यकारी अधिकृत डाक्टर हेक्टर गायरसले सेवाग्राहीलाई उच्चतम स्वास्थ्य सेवा पुगोस् भन्ने उद्देश्यका साथ लागि परेको परिणम स्वरुप आज उच्च गुणस्तरका सिटिस्क्यान मेशिन सहित सेवा प्रवाहको आरम्भ गर्न सफल भएको बताउनुभएको छ ।

बुधबार अस्पतालले सिटी स्क्यान सेवा शुभारम्भका क्रममा आयोजित कार्यक्रममा सम्बोधन गर्दै डाक्टर हेक्टरले भन्नुभयो– ‘एक वर्षको दौरानमा अस्पतालले सेवाग्राहीहरूको असुविधालाई सम्बोधन गर्ने क्रममा भित्राएको यो तेस्रो प्रविधि हो । निकट भविष्यमै डाइलासिसका लागि दश वटा मेसिन जडान गर्ने कार्यलाई आजैबाट अगाडी बढाउने छौं । जसको सुभारम्भले यो क्षेत्रमा अनुकरणीय योगदान पुर्याउने विश्वास शीर मेमोरियल अस्पताल र सहयोगी दाता रोटरीयनहरूले लिएका छौं । यो अभियानलाई सार्थक तुल्याउन र हामीलाई प्रेरणा दिनुहुने हाम्रा अस्पतालका कर्मचारीहरुप्रति अस्पताल प्रशासन कृतज्ञता व्यक्त गर्न चाहन्छ । अस्पताल प्रशासन र व्यस्थापनको चाहनाले मात्रै यो सफलता प्राप्त हुने थिएन । यसमा इट्टा थप्ने काम तल्लो तहमा कार्यरत कर्मचारीहरूको त्यो त्याग र सर्पणबाट प्राप्त भएको हो । जसले आफ्नो छाक काटेर प्रविधिमैत्री सेवा दिनका लागि अस्पताल सक्षम हुनुपर्छ भन्ने भावना जागृत गर्नुभयो । जसका कारण हामीलाई यस किसिमको चलायमान उर्जा प्राप्त भयो । जुन स्वास्थ्य सेवाको क्षेत्रमा अनुकरणीय र अविश्मरणिय छापका रुपमा स्थापित हुन पुग्यो । गरे के हुँदैन भन्ने सन्देश वहाँ हरुको त्याग र समर्पणबाट लिन सक्छौं । जुन अभियानलाई विभिन्न क्षेत्रमा खटिनुभएका सहयोगी मनहरू र अन्र्तराष्ट्रिय क्षेत्रमा स्थापित रोटरियनहरूको अपार र अनवरत सहयोगले यस क्षेत्रमा नागरिकहरूलाई भरपर्दो र गुणस्तरीय स्वास्थ्य सेवा दिन शीर मेमोरियल अस्पताल अब्बल सावित भएको छ ।’