नारी दिवसमा महिला सशक्तिकरणमा शीर मेमोरियल अस्पतालको भुमिका

“यत्र नार्यस्तु पूज्यन्ते, रमन्ते तत्र देवताः।
“यत्रैतास्तु न पूज्यन्ते, सर्वास्तत्राफलाः क्रियाः।।”

भावार्थः यो श्लोकले समाजमा महिलाको महत्वलाई उजागर गर्छ । जहाँ महिलाहरूको सम्मान र पूजा गरिन्छ, त्यहाँ समृद्धि र दैवी आशीर्वाद प्राप्त हुन्छ । तर जहाँ महिलाहरूको अपमान वा बेवास्ता गरिन्छ, त्यहाँ सबै काम असफल र निष्फल हुन्छन् ।

काभ्रेपलाञ्चोक/ शीर मेमोरियल एडभेन्टिस्ट अस्पताल बनेपाले १ सय १६ औं अन्तर्राष्ट्रिय नारी दिवसको अवसरमा महिला सशक्तिकरण कार्यक्रम सम्पन्न गरेको छ ।
शीर मेमोरियल अस्पतालका प्रमुख कार्यकारी अधिकृत डाक्टर हेक्टर गायरसले समाज रुपान्तरणमा महिलाहरुको सशक्त भूमिका रहने बताउनुहुँदै १ सय १६ औं अन्तर्राष्ट्रिय नारी दिवसको नारालाई व्यवहारमा कार्यान्वयन गर्न सक्यौं भने समाज विद्यमान अवस्थामा रहेको नारी उत्पिडनको विपक्षमा महत्वपूर्ण योगदान पुग्ने विश्वास व्यक्त गर्नुभएको छ ।

जसको लागि शीर मेमोरियल अस्पतालमा कार्यरत सम्पूर्ण महिला कर्मचारीहरुको सम्मानजनक समावेशी योग्यताको कदर गर्दै व्यवहारमा उतार्न सक्नु नै नारी दिवसप्रतिको सच्चा सम्मान हुने बताउनुभएको छ । आजको समस्या भनेकै महिला सशक्तिकरणका नाममा जती पनि कार्यक्रमहरु आए, ति काजगमै सिमित भए । जसले गर्दा महिलाहरुको योग्यता र योगदानको कदर हुन नसक्नुको कारण हो । त्यसैले कुरामा हैन काममा विश्वास गरौं । कामको सम्मान गरौं तब मात्र अन्तर्राष्ट्रिय नाराले न्याय पाउने विश्वास व्यक्त गर्नुभएको छ । कार्यक्रमका अवसमा अस्पतालमा कार्यरत महिला कर्मचारीहरुलाई सम्मान गरिएको अस्पतालका एचआर उमेश एमन थापाले जानकारी गराउनुभएको छ ।

पहिलो पटक सन् १९११ मा मनाइएको अन्तर्राष्ट्रिय महिला दिवस त्यसवर्ष अस्ट्रिया, जर्मनी, डेनमार्क र स्विटजरल्यान्डमा मनाइएको थियो । त्यसको १०० वर्ष पछि सन् २०११ मा नारी दिवसको शततक उत्सव मनाइयो । यद्यपि यस दिवसलाई संयुक्त राष्ट्र सङ्घले चाहिँ सन् १९७५ मा आधिकारिक मान्यता दिएको थियो ।
न्युयोर्क सहरमा सन् १९०८ मा १५ हजार महिलाले आफूहरूमाथि भएको असमानता जस्तै कि काम गर्ने समय थोरै हुनुपर्ने, समान ज्याला दिनुपर्ने र मतदानको अधिकार हुनुपर्ने मागसहित ¥याली गरेसँगै नारी दिवसको सुरुवात भएको थियो । त्यसको एक वर्षपछि अमेरिकाको समाजवादी पार्टीले पहिलो राष्ट्रिय महिला दिवस घोषणा गरेको थियो । महिला दिवसको मार्च ८ तारिखमा मिति पर्ने कारण चाहिँ अलिक रोचक छ । खासमा महिला आन्दोलन सुरु भएको मिति त्यति बेलाको जुलीअन पात्रोअनुसार फेब्रुअरी २३ आइतबार थियो । यही मिति ग्रिगोरीअन पात्रोअनुसार मार्च ८ हो र त्यस कारणले हरेक वर्ष मार्च ८ मा नै महिला दिवस मनाइन्छ ।