वेस्ट ब्याङ्कमा इजरायली सेनाको छापा, नौ प्यालेस्टिनी पक्राउ

काठमाडौं, युद्धविराम सम्झौता कायम रहेकै अवस्थामा इजरायली सेनाले बिहीबार वेस्ट ब्याङ्कका विभिन्न क्षेत्रबाट नौ जना प्यालेस्टिनी नागरिकलाई पक्राउ गरेको जनाएको छ।

प्यालेस्टिनी समाचार एजेन्सी डब्लुएएफएका अनुसार कल्किल्याबाट पाँच जना र नाबलुसबाट चार जना प्यालेस्टिनीलाई उनीहरूको घरमा छापा मारेर पक्राउ गरिएको हो।

यसैबीच, इजरायली सेनाले नाबलुसको पूर्वी क्षेत्रमा रहेको बालाटा शरणार्थी शिविरमा पनि आक्रमण गरेको बताइएको छ। अल–मदारिस स्ट्रिट र अल–जामासिन क्षेत्र हुँदै सेना शिविरभित्र प्रवेश गरेको जनाइएको छ।

कब्जामा रहेको वेस्ट ब्याङ्क तथा पूर्वी जेरुसेलमका विभिन्न सहर र शरणार्थी शिविरहरूमा इजरायली सेनाले दैनिकजसो छापा मार्ने, पक्राउ गर्ने तथा सैन्य कारबाही सञ्चालन गर्ने गरेको अन्तर्राष्ट्रिय सञ्चारमाध्यमहरूले उल्लेख गरेका छन्। यस्ता कारबाहीका क्रममा झडप र गोली चल्ने घटनासमेत हुने गरेका छन्।