सफल रहोस् २०७४

२०७३ साललाई विदा दिई नयाँ वर्ष २०७४ प्रासम्भ भएको छ । यो वर्ष राजनीतिक संक्रमणलाई किनारा लगाउन माघ ७ अगावै तीनवटा चुनाव गराउनुपर्ने बाध्यकारी व्यवस्था संविधानले नै गरेको छ । स्थानीय तह, प्रदेशसभा र संघीय संसद् तीनवटै चुनाव मुलुकभरका मतदाताको प्रत्यक्ष सहभागितामा हुनुपर्ने छ । संवैधानिक व्यवस्थाअनुसार सरकारले गराउन सके पनि, नसके पनि यो वर्षको अधिकांश समय चासो र चर्चाको केन्द्रमा चुनाव नै बन्ने छ ।
२०६२/६३ को लोकतान्त्रिक आन्दोलन र त्यसपछिका विभिन्न आन्दोलनबाट प्राप्त उपलब्धि संविधानसभाबाट लिपिबद्ध गर्दै डेढ वर्षअघि जारी भएको संविधान कार्यान्वयनमा दलहरूले प्राथमिकता दिनुपर्छ । २०७३ साल संविधानको अन्तर्वस्तुमा असन्तुष्टि जाहेर गर्दै विशेषगरी मधेसी मोर्चारगठबन्धनले आन्दोलन गर्ने, तिनीहरूलाई मनाउन सत्तारूढ दललाई मनाउन खोज्ने जस्ता अलमलमै समय बित्यो । आन्दोलन र वार्ता गर्ने तर निष्कर्षमा नपुग्ने शृंखला चलेको डेढ वर्षभन्दा बढी भइसक्दा पनि सहमति र समझदारी भएको सुखद् समाचार जनताले पाएका छैनन् । सरकारले २०७४ वैशाख ३१ गते स्थानीय निर्वाचन गर्ने घोषणा गरेको छ, मुलुकका अधिकांश क्षेत्र चुनावमय बसिकेको अवस्था छ । तर एक महिनामात्रै समय बाँकी रहँदा पनि ‘चुनाव होला त ?’ भन्ने आशंकाहरू पलाएकै छन् । सरकारले संविधान कार्यान्वयन र चुनावको वातावरण तयारका लागि ०७३ सालमै दुईपटक संविधान संशोधन गर्न खोज्यो तर सफल हुन सकेन ।
२०७३ सालमा आशा जगाउने केही काम भएका छन् । सबभन्दा ठूलो उपलब्धि मानिएको छ, लोडसेडिङको अन्त्य । स्वास्थ्य क्षेत्रमा दूरगामी महàव राख्ने नीतिगत निर्णयहरू गएको वर्षमा भएका छन् । संविधानले बाध्यकारी व्यवस्था गरेपछि बेलैमा सरकारले वार्षिक बजेट तथा कार्यक्रम ल्याउन थालेको छ, जसले ‘बजेट ढिलो आयो’ भन्ने बहानाबाजी अन्त्य गरेको छ । चालु आर्थिक वर्षमा बजेट तथा कार्यक्रमको कार्यान्वयन सन्तोषप्रद नदेखिनु भने सरकारको कमजोरी हो । मुलुकको आर्थिक वृद्धिदर सरकारी लक्ष्यअनुसार ६.५ प्रतिशत पुग्नु पनि उत्साहजनक कुरा हो । पूर्वाधार निर्माणमा भइरहेका प्रगतिले पनि समृद्धिको आशा जगाएको छ । बहुप्रतीक्षित मेलम्ची खानेपानी आयोजना सम्भवतः यसै वर्ष पूरा हुनेछ । विगतमा हासिल केही संकेतले जगाएका आशालाई मूर्तरूप दिन भने राजनीतिक स्थिरता चाहिन्छ । त्यसका लागि बेलैमा तीनै तहको निर्वाचन गर्नु जरुरी छ । त्यसैले सरकारले पनि जिम्मेवार भएर संविधानको पालना गर्दै तिनै तहको निर्वाचन समयमै सफलताका साथ सम्पन्न गरोस् भनी २०७४ सालको शुभकामना !