अझै होस खुलेन मुकेशको

बनेपा ÷ जनआन्दोलन २०६२÷०६३ को क्रममा २०६२ साल चैत्र २७ गते सुरक्षाकर्मीले चलाएको गोली चलाएको गोली लागि घाइते भएका मुकेश कायस्थको अझै होश खुलेको छैन ।
उनी घाइते भएको ७ बर्ष पुरा हुन लागेको छ  तर पनि उनको अझै होश खुल्न सकेको छैन । जनआन्दोलनमा सहभागी भएर अझै वेहोश रहेका मुकेशको होश खुल्ला भन्ने आशा त परिवारलाई हराईसकेको छ तर जनआन्दोलनमा छोराले दिएको योगदान र धेरै शहीदहरुले दिएको बलिदानी पनि हराउने होकि भन्ने चिन्तामा परिवार छ ।
मुकेशका बुवा कृष्णमान कायस्थ दलहरुले सहमतिको संविधान नदिएर मुकेश र मुकेश जस्ता कयौँ शहिदको योगदानको अपमान गरेको बताउँछन् । अझै अचेत अवस्थामा रहेका मुकेश घाइते भएदेखिनै एक्लो छोराका बाबु, आमा, हजूरबुबा उनको होश कहिले खुल्ला भनेर कुरिरहेका छन् । बनेपास्थित विद्या सागर बोर्डिङ स्कूलको कक्षा ८ मा पढ्दै गरेको १५ बर्षे मुकेश जनआनदोलनमा घाइते भएर २२ बर्ष पुगिसकेका छन् । तर जनआन्दोलनबाट २ सय ४० बर्षदेखिको राजतन्त्र ढलेर गणतन्त्र आएपनि र देशमा चलेको १० बर्षे शसस्त्र युद्धको अन्त्य भएपनि देशमा सविधान  नबनेको र लोकतन्त्रको प्रत्याभुति नभएकोमा मुकेश परिवार चिन्तित छ ।  सबै दलहरु आफ्नो स्वार्थ छोडेर देशको स्वार्थमा लाग्न मुकेश परिवारको आग्रह छ ।