पत्रकारहरुले न्याय पाउनुहुन्छ–खरेल

धुलिखेल ÷ जिल्ला विकास समितिको हल जिल्लाका कृयाशिल सञ्चारकर्मी, केही व्यवसायी र नागरिक समाजका प्रतिनिधीको उपस्थितीले भरीभराउ थियो । सबैले आफ्ना कुरा राखिसकेका थिए । एसएसपी रमेश खरेलले पनि आफ्नो भनाई राखिसकेका थिए । त्यतिकैमा, हालै पत्रकार माथि वाइसिएल कार्यकर्ताले आक्रमण गरेको प्रसंग सुनाउँदै नेपाल पत्रकार महासंघ काभ्रेका अध्यक्ष महेश पौडेलले देशैभर चर्चा कमाएका रमेश खरेल काभ्रे आएकोमा पत्रकारले न्याय पाउने आशा व्यक्त गरे । “देशभर नमुना काम गर्नुभएको छ, काभ्रेमा पत्रकार कुट्नेलाई कार्वाही गरेर नमुना काम देखाउनुस् । ” अध्यक्ष पौडेलले आग्रह गरे । काभ्रे प्रहरी प्रमुख गिता उप्रेतीलाई देखाउँदै उनले भने, “पत्रकारहरुले न्याय पाउनुहुन्छ, गिता म्यामले अनुसन्धान थालिसक्नुभएको छ । ” हालै वाग्मती अञ्चल प्रमुखको रुपमा सरुवा भएर आएका प्रहरी वरिष्ठ उपरिक्षक (एसएसपी ) रमेश खरेलले काभ्रे बाट नै दण्डहिनता अन्त्यय गर्ने अभियान शुरु गर्ने उद्घोष गरे । “काभ्रेबाट यो अभियानको शुरुवात हुन्छ, यसमा लाग्नुस्, ” बाँकी ३ पेज मा पत्रकारहरुले … काभ्रे प्रहरी प्रमुख प्रहरी उपरिक्षक गिता उप्रेतीलाई निर्देशन दिँदै उनले भने, “दण्डहिनता अन्त्यय गर्नको लागि सबै सरोकारवाला मिलेर अघि बढ्नुपर्छ, यसको थालनी गिता म्यामले गर्नुस् । ” उनले जनताको विश्वास जितेर काम गर्न पनि मातहतका प्रहरी अधिकारीहरुलाई निर्देशन दिए । “कोही रिसाउला, कोही खुशी होला भनेर हिसावकिताव नगर्नुस्, राज्यको तलव र रासन पच्ने गरेर काम गर्नुस् । ” निर्देशन दिँदै उनले भने । जुनसुकै काम गर्नको लागि पनि आशावादी भएर अगाडी बढ्नुपर्ने बताउँदै उनले पहिला आफु ठिक हुनुपर्ने तर्क गरे । “प्रहरी आफैँमा ठिक हुनुपर्छ, अनि मात्रै जनताले हामीलाई विश्वास गर्छन् । ” प्रहरीलाई उसको गुण र दोषको आधारमा शंका र विश्वास गर्न उनले अनुरोध पनि गरे । दुई राजमार्ग जोडिएको जिल्ला काभ्रेमा तस्करी नियन्त्रण आफ्नो प्रमुख प्राथमिकता हुने उनले बताए । “यहाँ कुनै तस्करी हुने छैन, अव कोही अपराधी तस्करी, गुण्डालाई वाँकी राख्दैनौँ । ” आफ्नो योजना सुनाउँदै उनले भने । आफ्नो तर्फबाट कुनै कसर बाँकी नराख्ने बताउँदै एसएसपी खरेलले तस्करी र अपराध नियन्त्रण्मा लाग्न जिल्ला प्रहरी प्रमुखलाई निर्देशन दिए । तसकरी तथा अपराध नियन्त्रणको लागि व्यवसायी, राजनीतिक दल , पत्रकार र नागरीक समाजको सल्लाह र समन्वयको खाँचो समेत उनले औँल्याए । काभ्रे आफ्नो जन्मभुमि समेत भएको सुनाउँदै उनले काभ्रेमा केही नमुना गरेर देखाउने प्रतिवद्धता पनि व्यक्त गरे । “म जन्मेको पनि यही भयो, २३ बर्ष जागिर खाएँ, अव ७ बर्षपछि म यही आएर बस्नुपर्छ, यही अवधीमा यहाँ राम्रो काम गरेर देखाएर यहाँ बस्ने वातावरण बनाउँछु । ” उनले भने । नेपाल महिला संघकी केन्द्रिय सदस्य समेत रहेकी अधिवक्ता जीवना वादे श्रेष्ठले खरेलको आगमनले जिल्लामा केही सुधार हुने आशा व्यक्त गरिन् । “धेरैले चर्चा त सुनियो, रमेश खरेल कस्तो रहेछ हेरौँला भनेका छन् ” उनले भनिन्, “आफ्नो प्रतिवद्धतालाई व्यवहारमा पनि उतारेर देखाउनुहोला । ” राजनैतिक संकटलाई निकास दिन कानुनी शासन नै आवश्यक रहेको बताउदै काभ्रेबाट नै दण्डहिनताको अन्त्यय गर्ने उद्घोषको प्रशंसा समेत गरिन् । सबैसँग प्रहरीको व्यवसायिक सम्वन्ध मात्रै रहेन सुनाउँदै उनले अन्त्ययमा भने, “धेरै गर्न त सक्दिन, आउनुस्, कालो चिया खाँऔ, जिल्लालाई अपराधमुक्त गर्न सहकार्य गरौँ । ” वाग्मती अञ्चल प्रहरी प्रमुख भएर हालै सरुवा भएर आएका खरेल क्षेत्रभित्रका जिल्लाका सरोकारवालाहरुसँग छलफल गरेर रणनीति बनाउने योजनामा छन् । उनले सोमबार सिन्धुपाल्चोक, रसुवा, नुवाकोट, धादि
ङ पुगेर त्यहाँका सरोकारवालाहरुसँग छलफल गरेका छन् ।